حلب مفرق الإذاعة – بيتي هون 34

من الذاكرة

البيوت حكايات ولما منبعد عنها بتكبر الحكايات وبتكبر البيوت رغم أنه يمكن ما عاد نزورها مرة تانية ويمكن آخر مرة ودعنا كانت آخر فرصة لنشوفه.

ضيف حلقة اليوم الإعلامي نورس يكن ابن مدينة حلب، يلي وهو عم يغادر حارته وبيته ما اتطلع لورا ليودع بيته، بعد جولة طويلة بالمدينة يلي عاش فيها حياته، رجع على البيت وطلع على المطار بدون ما يتطلع مرة أخيرة على هاد البيت،هاد البيت يلي رجع مع الزميل عمرو سواح لزيارته مرة تانية بس افتراضيا على هوا راديو سوريالي .

للصوت 

العناوين السورية فيها شي سحري .. وكل مرة فيها مفاجأة جديدة، فببداية الحلقة منسأل نورس عن بيته فبيعطينا طريقتين مختلفتين للاستدلال على بيته، فإئا جاي من جهة بتكون نزلة الزبدية مفرق الإذاعة، وإذا جاي من جهة تانية بتكون طلعة الزبدية، بهي المنطقة بين سيف الدولة والإذاعة والأنصاري، كان بيت نورس كملوا معنا سماع الحلقة لنعرف أكتر تفاصيل.

– – – –

اسمعوا الحلقة عالساوندكلاود

والصورة

بعض الصور للأماكن والمدن يلي عاش فيها نورس يكن. .

تاني بناية على اليسار هيه بناية يكن، بهي البناية عاش نورس، بهي الحارات تذكر كتير من التفاصيل عن آخر مرة شاف فيها بيته، تذكر الحديقة الصغيرة يلي كان يلعب فيها، تذكر الكورنيش والعشاق، واتذكر دكانة صغيرة مميزة، دكانة أبو عبده الصغيرة، يلي ما حدى بيقدر طلع شي منها غير أبو عبده، بلهجته التقيلة حتى على أهل حلب.

بهي الصورة منشوف الإطلالة تبع بيت نورس على مدينة حلب، ويلي بيطلع فيها بشكل واضح مسجد حذيفة بن اليمان.

هاد هو الكورنيش يلي حكى عنه نورس  بالحلقة، هون كانوا يتخبوا العشاق، بس لسوء حظهن كان في مفرزة أمنية كانوا يلقطوا أحياناً العشاق، ويضلوا يهددوهم لحتى بياخدوا منهم مصاري. وبيتذكر نورس كمان بهاد المكان شخص كان يسمي حاله "شيخ الجبل" ساكن بوحدة من البنايات يلي على الكورنيش مباشرة.. فإذا بدك تاخد راحتك على الكورنيش بدك تكون عندك علاقة مميزة مع شيخ الجبل، يلي رح يغض نظر عنك كعاشق عم تحاول تلاقي لحظات سكينة.

في معلومات ما قدرنا نحكي عنها مع نورس جوات الحلقة من هي المعلومات بيت العيلة القديم يلي بحلب القديمة المدرسة العثمانية أو زقاق بيت اليكن، بهي الصورة فينا نشوف بيت يكن القديم قبل ما ينتقل جده من المدينة القديمة ويعمر بيت بأوائل الحارات خارج  سور حلب.

نبذة عن الكاتب

عمرو سواح

معد ومقدم برامج في راديو سوريالي .ناقد مسرحي وكاتب ومحرر. يقيم حالياً في مدينة بوردو

Loading Facebook Comments ...