جولة دمشقية مع الدكتور نعيم هيلانه – بيتي هون 27

من الذاكرة

هي الحلقة من بيتي هون شوي مختلفة، فضيفنا بذاكرته الكبيرة الواسعة، والصور الكتيرة يلي مرسومة بذاكرته، والبيوت الكتيرة يلي سكنها من طفولته لحتى مغادرته سوريا خلت الحلقة تطول، ومع متعة هي الصور والحكايا نسينا حالنا معه ليرجع يرسم الدكتور نعيم هيلانه كتير من حارات الشام وبعض ضواحيها بصوته، رسم الحارات ورسم البيوت ورسم ذاكرة أطفاله.

ضيف حلقة اليوم الدكتور نعيم هيلانه طبيب أسنان وأخصائي جراحة وتجميل الوجه والفكين .. يلي رغم حصوله على الإقامة بكندا بالـ 2006 إلاّ أنه قضى الفترة الأكبر بين 2006 و 2011 بسوريا، واضطر أنه يترك بيته لأسباب تتعلق بإقامته بكندا.

للصوت 

شوي ومنرجع جملة كتير من الناس رددوها قبل ما يتركوا سوريا لأسباب مختلفة، وطالت هي الغيبة سنة وسنتين، وصاروا 8 سنين، بحديثنا مع الدكتور نعيم هيلانه منروح بزيارة طويلة من الزبلطاني للجديدة، مروراً بكتير مناطق بالشام القديمة والجديدة، لنتذكر مع بعض كملوا سماع هي الحلقة من بيتي هون

اسمعوا الحلقة عالساوندكلاود

– – – –

والصورة

بعض الصور للأماكن والحكايات يلي حكالنا عنها د.نعيم هيلانه

بالزبلطاني قريب من سوق الهال الجديد قريب من ملعب العباسيين .. هاد كان آخر بيت ضل  عايش فيه الدكتور نعيم هيلانه للحظة مغادرة سوريا، وهاد البيت يلي غادره غصباً عنه، وضل يقول بكرة بيرجع.

تنقل الدكتور هيلانه بطفولته بكتير من البيوت، واحد من هالبيوت طاله القص الجائر، يلي كان مشهور بسوريا بفترات كتيرة. واحد من هي البيوت كان بيت عمّره والده، بقطعة أرض عند الزبلطاني باتجاه الشرق، مجمع 8 آذار وسوق الهال الجديد، والشارع يلي بيروح اليوم باتجاه جوبر هاد الشارع مرق جوا بيتهم، وسكنوا فيه لفترة طويلة بيتذكرهم بالتفصيل، لتعرفوا أكتر اسمعوا الحلقة.

البيت يلي ولد فيه هوه بين حمام البكري للنوفرة، قوس جوبيتر، بيوصفه الدكتور نعيم وبيقول بتطلع ع باب السلام على العمارة بهي المنطقة كان الكل بيعرف الكل، وما ممكن تضيع، وإذا ضعت أكيد كان في حدا يرجعك على البيت. بهاد البيت  كان في مشرقة بالبيت عملها والده للسيد نعيم غرفة أرانب.. ولما سأل أبوه ليش عملتها غرفة أرانب وقال له أبوه أنه إذا ربى حمام بيصير الناس بيقولو أنه كشاش حمام، اما إذا ربى دجاج فأصواتهن عالية. البيت لسا موجود وما صار هدف سياحي وبالتالي ما تحول لقهوة.

نبذة عن الكاتب

عمرو سواح

معد ومقدم برامج في راديو سوريالي .ناقد مسرحي وكاتب ومحرر. يقيم حالياً في مدينة بوردو

Loading Facebook Comments ...