حجرة ورا حجرة – حكواتي سوريالي 204

مين بيعرف لعبة السبع حجار؟ بتعرفوا كيف لازم ينقي اللاعبين الحجرات؟ وكيف لازم يصفوهون فوق بعض؟ قديه التوازن مهم؟

هيك كانت عم تفكر ندى بطريقة لترجع تبني يلي تهدم من سوريا، وتعيد اعمارو بشكل صح ومتوازن

خليكون مع عمكون #أبو_فاكر لتعرفوا كمالة الحكاية بحلقة اليوم من #حكواتي_سوريالي

حكواتي سوريالي كل إثنين الساعة 8:30 مساءً ضمن فترة الحكايا بتوقيت سوريا على راديو سوريالي.

اسمعوا الحلقة عالساوندكلاود

 

بلعبة السبع حجار، التوازن كتير مهم، بس كمان اخيارك للحجرات مهم، حتى تقدر تعمل التوازن ومايوقعوا الحجرات، يمكن من هاللعبة بلشت ندى تفكر بالهندسة وأهميتها، ويمكن من هالتوازن بلشت تفكر كيف ممكن تتعمر البلد بعد هالخراب هاد كلو.

ندى انسانة عاشت حياتها كلها تتجنب الغلط، ماقدرت أبداً تقبل الفساد يلي موجود بمؤسسة الاسكان العسكري يلي توظفت فيها اول ماتخرجت مهندسة، ف قدمت استقالتها، ولما زوجها تعرض لضغوط بشغلو، اما يقبل يلعب بالقوانين كرمال عيون واحد من المسؤولين واما ح يورطوه بمصيبة يروح فيها، فوراً قالتلو استقيل وربك مابيقطعنا، أكيد بنلاقي شغل تاني..

هلق يمكن في ناس ح تقول بس هي انهزامية وهروب من المواجهة، صح.

أو يمكن صح، لأنو مابدنا ننسى انو يلي عاش بسوريا وعرف كيف ماشية الأمور، بيعرف انو في مواجهات انت ح تكون خسران فيها أكيد، لأنك مع الحق، والحق بدهاليز الحكومة والنظام هو الطرف الخسران والأضعف، ويلي بيوقف معو بيختفي أو بينتهي، أو بيقعد ببيتو بعد فضيحة، ف لذلك كتار من الناس كانو يختاروا يقعدوا بالبيت لحالون…

المهم أخواتي انو بعد مافتحوا مكتبون الهندسي الخاص، لأنو زوجها كمان مهندس، وقرروا يشتغلوا بمشاريع صغيرة على قد امكانياتون، وشوي شوي كبر المكتب بسبب سمعتون المنيحة، وشغلون النضيف والحقاني، صحيح ماكانو يربحوا كتير لأنو كانو يحطوا أسعار منطقية لكلشي، وابداً مايرضوا ياخدوا سمسرة من أي متعهد، بس كان الربح يلي يجيهون مكفيهون ورضاينين فيه..

بديت الثورة بسوريا، وبلشت المظاهرات، وكانت الهتافات يلي يسمعوها تقوت جوا قلبون ويحسوها طالعة منهون، كتير صح هاد الشي، حرامية، عن جد حرامية، كل يلي ماسكين البلد حرامية، بدنا نعيش بكرامة، بدنا حرية حقيقية، بدنا يتغير هالنظام، وبدنا وبدنا وبدنا كتييييير شغلات، طيب هاد وقت اننا نشارك ونحاول نغيير، هاد وقت نقول لأ للظلم والأذى والسرقة وكلشي غلط، وفعلاً بلشوا مشاركة بالمظاهرات، وبعدين صاروا أعضاء بوحدة من التنسيقيات، وصار في تخطيط لنشاطات مدنية كتيرة، نفذوها رغم كل المخاطر يلي عم يتعرضولها من المن وملاحقتون.

بس مع الوقت، ومع زيادة العنف من النظام بالتصدي للمظاهرات والاعتصامات، وزيادة الاعتقالات، والموت بين الشباب يلي عم يتظاهروا ويتقوص عليهون، بلش الوضع يختلف، خلال سنة ونص كان معظم رفقاتون معتقلين او ميتين أو هربانين برا البلد لأنهون مطلوبين، وبلش العنف يولد عنف مضاد من قبل الناس، النظام اطلق سراح كتير من مهربين السلاح والزعران يلي محبوسين، وعدد كبير من قيادات التنظيمات المتطرفة يلي كانو محبوسين بصيدنايا، اطلق سراحون وتركهون ينتشروا بين الناس، الناس يلي عم يتعرضوا للموت بكل لحظة، ويلي بلشوا يلاقوا الحل هو بالتنظيمات المسلحة، بالبداية بهدف الدفاع عن النفس وعن الأهل، بعدين بهدف التصدي للأمن والشبيحة والقضاء عليهون، بعدين فلتت القصص وصار كل فصيل مسيطر على منطقة معتبر حالو دولة، وفرض قوانينو الخاصة على العالم.

وهون كان القرار النهائي من ندى وزوجها انو هنن مستحيل يكونو جزء من هالفوضى، لايمكن يقبلوا بهالشي، مو هي الثورة يلي بدأو فيها، مو هاد الحلم، اكيد المسؤولية بيحملها النظام يلي وصل الناس لهالمكان، بس مع هيك هنن مابيقدروا يبقوا ويسكتو ع هالشي.

مشان هيك كان قرارون اول شي يبتعدوا عن كلشي الو علاقة بالثورة، بس بعدين رجعوا حسوا انو هالشي غلط، لأنو الثورة حق، وصح، لازم يكونوا جزء منها، بس ضمن الشي يلي بيفهموا فيه، وهو الهندسة، البلد ح تحتاج لكتير من الدراسات الميدانية لكيفية اعادة البناء، والتنظيم السكاني الصح، خلينا نتعلم من الخطأ الكبير يلي صار بالتوسع العشوائي للمدن السورية بسبب الفساد، ونستفيد من الخراب يلي صار ونرجع نعمر البلد بشكل صح

المخطاطات والدراسات يلي بلشوا يعملوها كانت مهمة كتير لبعض المنظمات الدولية يلي عم تشتغل على موضوع اعادة الاعمار، وكانو بدهون ناس من جوا البلد تعمل دراسات حقيقية، مشان هيك تم التشبيك بينون وبين احدى المنظمات يلي عم تشتغل بالمانيا، وصاروا يبعتولون كل المخططات يلي عم يرسوموها مع شروحات كافية ووافية، كانو عم يبذلوا كل جهد ممكن، ليستغلوا الامكانات الطبيعية الموجودة بالبيئة المحيطة لأي منطقة، برسم شكل ومخطط لبناء يلي ممكن ينعمل فيها، كانو فعلاً عم يحاولوا يلاقوا توازن بين المنطقة وجغرافيتها وسكانها وتاريخها والموارد يلي فيها، كانو عم يحاولو يتلافوا كل خطأ سبق وتم ارتكابوا بتنظيم هالمناطق، والاستفادة منو وتصحيحو، مشان هيك صارت المخططات يلي عم يرسموها ملفتة للنظر عند المنظمات المختصة بموضوع اعادة الاعمار، ويلي كل مالها عم تكتر، وصاروا عم يحاولوا يتواصلوا معهون، وهالشي طبعاً خلى اسمهون ينعرف وينتشر ويوصل للنظام، من خلال المنظمات المشتركة يلي عم تشتغل مع الأطراف كلها، المنظمات يلي بتعتبر انو النظام طرف اساسي ولازم يكون بصورة كل شي عم يصير، وبالتالي بيقدر يعرف كل المعلومات يلي عندون، وبالتالي أي حدا عم يشتغل معهون من داخل سوريا، ومانو تابع الهون أو عم ينسق معهون، عم يكون تحت المراقبة، المراقبة للتاكد من ميولو وشو عم يعمل، وهاد يلي صار مع ندى وزوجها يلي فجأة لقو بابون عم يندق، وجاي لعندون ضابط برفقة مهندسين ايرانيين، كلبوا يقعدوا ويحكوا معهون عن تفاصيل شغلهون، وبعد استغرابهون من هالجلسة هي، وشو دخل المهندسين الايرانيين بالموضوع، لقوا انو الافضل يحكوا ومايمانعوا حتى مايثيروا شكوك انو هنن عم يعملوا شي مخالف، خاصة انو لقوا مع المهندسين الايرانيين نسخ من المخطاطات يلي هنن عم يرسموها ويبعتوها.

وبعد نقاش طويل ومخطاطات كتير انفردت ع الطاولات، واخد ورد، انعرض عليهون انو ينضموا لمجموعة المهندسين يلي عم يشتغلوا على موضوع اعادة الاعمار من الجهة الايرانية، ماقدروا طبعاً يرفضوا هالشي، وافقوا واتفقوا انو بعد يومين يرجعوا يلتقوا، وليلتها كانت اطول ليلة بلنسبة الهون، ضبوا كل الملفات والاوراق والصور يلي عندهون وحطوها بصناديق وجهزوها لينقلوها لمكان أمين، وتواصلوا مع صديقون بالمانيا يلي عم يشتغل معون شرحولوا الوضع وصلوا كلياتون لحل واحد وهو ضرورة سفرهون برا سوريا، لأنو اكيد بس تخلص مهمتوه ح يتخلصوا منهون، لذلك لازم يهربوا، بس كيف؟ المراقبة عليهون قوية وواضح انو الشارع فيو مين لاطيلهون، واكيد الحوجز القريبة من مكان سكنهون صار عندها اساميهون حتى يبقوا تحت العين، ف كان الحل الوحيد هو تهريب الوراق عن طريق بعض الجيران يلي بيثقوا فيهون، ونقلهون لبيت احد الصدقاء، يلي تولى مهمة نقلهون لمكان تاني ينعمللهون سكان وينرفعوا كلياتهون على النت، وبعدين يحاول يطالعون تهريب ع لبنان، متل محاولة ندى وزوجها الهروب لبيروت، بعد ماتأكدوا انو اسماؤون محطوطة على الحدود وعليهون منع مغادرة، جربوا حظون عن طريق الحدود البرية يلي عليها كتير دوريات مراقبة، لكن بعد ست محاولات فاشلة، قدروا ينجحوا ويوصلوا لبنان وهونيك تخبوا لبينما يشوفوا اذا ح يقدروا يساعدوهون ويبعتولون فيزا ليسافروا ع المانيا، أو ح يبقوا بلبنان متخبايين، أو ح يجربوا يهربوا ع اوربها بطريقة ما!!!!

لوقتها بتمنالون السلام والأمان، ع أمل انو يبقوا عم يشتغلوا هالشغل المهم

نبذة عن الكاتب

معد ومقدم برامج ، ومشرف قسم الدراما براديو سوريالي ممثل ومخرج مسرحي ، وحكواتي ، مقيم حالياً ببرلين_المانيا "بحب الطبخ ، وابتكار طبخات جديدة بخلطات مختلفة ، ويلي بيحب يجرب مية أهلا وسهلا ايمتى ماكان"

Loading Facebook Comments ...