من حمص بابا عمرو – بيتي هون 22

من الذاكرة

بابا عمرو يلي صارت حديث الكل مع بداية الثورة السورية، بعد حصار وعمليات قصف وتهجير، بعد تدمير تاريخ منطقة من قديمة بتاريخها بمزاراتها،.

اليوم بطلت تتصدر نشرات الأخبار، . بس بتضل بابا عمرو بقلوب كتيرين مو بس أهلها كتير من يلي مروا فيها …  

بابا عمرو اليوم صارت محاصرة بطوق أمني ومدخل واحد بيحدد الناس يلي بتدخل وبتطلع منها، هي المنطقة يلي حاول النظام عبر سنين طويلة قبل الثورة وبعد الثورة أنه يغيبها، ويغيب الغنى الاجتماعي يلي فيها، صارت بأغلبية أحياءها إما مهجرة أو على الأرض.

ضيف حلقتنا لليوم هو واحد من سكان بابا عمرو،

 

للصوت 

في سؤال دائم عن أثر المسرح على المجتمعات يلي منعيش فيها، هاد السؤال بيلاقي جوابه بشكل واضح مع فرقة أشبيلية بـ(( بابا عمرو))، هي الفرقة يلي تأسست داخل هاد الحي، وتطورت لتصير صورة عن كل حمص، ليطلع منها كتاب ومخرجين وممثلين مشهورين لليوم، ضيفنا المسرحي حسان الصالح بيحكيلنا بهي الحلقة  عن كيف تأسست هي الفرقة، وكيف تطورت، وشو الأثر يلي تركته على هاد الحي وعلى حمص كلها، بمحاولة لتوثيق هي التجربة المسرحية وما ننسى كيف طلعت للوجود، سمعوا معنا هي الحلقة، لتعرفوا أكتر عن بابا عمرو وعن مشروع الفرقة

 

اسمعوا الحلقة عالساوندكلاود

– – – –

والصورة

بعض الصور للأماكن والحكايات يلي ذكرنا فيها حسان الصالح

بابا عمرو  المنطقة يلي أخدت اسمها من مقام الصحابي عمرو بن معد يكرب الزبيدي المذحجي. هاد الحي يلي بيشبه كتير سوريا حسب وصف ضيف الحلقة يلي حضن الكل، وكان مساحة للفرح، وطالع أسماء كتيرة من المثقفين والكتاب والأطباء. هذا الحي يلي متل كتير من الأحياء والأماكن بسورية، اتدمرت بنيته الأساسية مرتين أول مرة مع المد العمراني الغير منظم، ومن بعدها بعد قيام الثورة السورية، تعرضت لتهديم وتخريب ممنهج انتهى مع زيارة بشار الأسد لأطلال هاد الحي. بعد نزوح الغالبية العظمى من سكانه الأصليين.

المقبرة والجامع

خميس المشايخ

صورة من الصور  التاريخية لهاد العيد السنوي، هاد العيد  القديم من قدم المدينة، ويلي بيقولوا العبض انه توارثته الديانات يلي مرت على سوريا، فبيرتبط بالمسيحية بشكل مباشر لأنه بيجي قبل أسبوع من انتهاء الصيام المسيحي، وبيربطوه البعض  بالطبيعة وطقوس فلاحية، وطقوس وثنية. بس يلي بيتذكروه هو عيد إسلامي ديني لمشايخ الطرق بمدينة حمص السورية، تحول ليكون عيد شعبي في مسرح، لتستعرض كل طريقة من الطرائق الإسلامية فنونهن  وطقوسهن.. فينكن تسمعوا أكتر عن ذكريات ضيف الحلقة مع هاد العيد بكمالة الحلقة.

صورة  تانية لخميس المشايخ،

هاد الخميس يلي بيجي بعد مجموعة من الأعياد المرتبطة بيوم الخميس يلي بتجي ورا بعض، من وقت بيوصل شهر شباط.

سبع خميسات هيه: خميس التايه ، خميس الشعنونة ، خميس المجنونة ، خميس القطاط، خميس النبات ، خميس الحلاوة وأكيد آخرها خميس المشايخ.

وبهاد العيد دلالات عظيمة ففيه كانوا يغنوا الأطفال أناشيد متل: عطونا زهوركن- حتى النبي يزوركن لمريم بنت عمران.. تقرا لكن البخور فاحت عطورك يا مريم - عا شباك الرسول شموا وصلوا عالرسول - هادي زهورك يا مريم

 – – – –

وعالخريطة

بعض من ذكريات حسان والأماكن يلي مر عليها ويلي عاش فيها .

نبذة عن الكاتب

عمرو سواح

معد ومقدم برامج في راديو سوريالي .ناقد مسرحي وكاتب ومحرر. يقيم حالياً في مدينة بوردو

Loading Facebook Comments ...