النفر السمين والدب الأسمراني – الحلقة 33

خرج النفر السمين المقيم في فرنسا في رحلة فردية إلى غابات الشمال السويدي وهناك صادف الدب الأسمراني فدخل إلى أقرب قفص من الأقفاص المخصصة لحماية البشر من الدببة في الغابات وأقفل على نفسه قبل أن يبدأ بالحديث مع الدب.

النفر السمين يتابع حديثه مع الدب الأسمراني:

 قام كملت طريقي متل العادة واحزر مين شفت؟! احزرلك حزرة.. زنجر بذاته.. إي هاد الكلب اللي ما بعرف اسمه.. بس مو لحاله داشر هالمرة.. لأ.. كان مربوط بحبلة وماشي قدام صاحبه.. صاحبه هيك قصير متروس ترس بالستينات من عمره يمكن.. الظاهر هو صاحب شي بستان جوة.. قلتله بونجور عالماشي وهو  قال لي بونجور..بس زنجر ركض علي ليسلم علي و صاحبه بلش يسحبه.. انتبهتله أنو العمى لك هاد زنجر.. هههههههه مشي الزلمة هو وزنجر وأنا وقفت بأرضي وجمدت وناديتله.. مو للكلب.. لصاحبه.. مسيو مسيو  وقلتله وهو وماشي وملتفت لناحي أنو أنا بعرفه لكلبه.. مرة مشي معي تلات ارباع الساعة ووصلني عالكورنيش تبع النهر.. وضحك الزلمة وضله ماشي وزنجر قدامه بس مربوط كان هالمرة.. أبصر شو عامل..  شي طيب هالفرخ يا أبو شريك.. يسلموا إيديك.. مزوق ..بصحتك .. خلينا ندوق كم لحسة من هالعسلات قبل ما ننام أحسن الشي..  يا سلام.. شي فخم .. أصلي.. أنت ما بتعرف أنو في عسل أصلي وعسل مغشوش.. هون عندك كله أصلي.. مشان هيك بيستاهل الواحد ينقرص مشانهن.. شي طيب طيب.. ليش بيغشوا العسل؟! مستغرب مو هيك؟! إي نحنا عنا بكل شي في الأصلي وفي المغشوش.. حتى بالبشر.. في أصلي وفي مغشوش.. استوى الفرخ.. كول.. دوق.. ما حطيتله حد هاد.. بس استنى شوي ليبرد.. خخخخخخخخخخخخ… خخخخخخخخخخ.. عم أغفى لا تواخذني.. خدلك غفوة أنت كمان إذا بدك .. رح افوت بكيس النوم استحياطاً .. بخاف انام وأتجمد وما افيق ههههههههههه  تصبح على خير.. خخخخخخخ… خخخخخخخخ…

صباح الخير.. صباح الخير أبو سمرا.. وينك؟! أبو سمراااااا.. صباح الخير.. شلونك اليوم؟! شفتني وأنا نايم؟! شلون؟! بشخر شي؟! من التعب الواحد بيشخر..  يا سيدي أحلى ليلة بكل عمري بدون مبالغة..  أنت أول شخص من السكان الأصليين  بسهر معه على فكرة .. تخيل.. إي.. ما لك مصدق؟! بدك تصدق.. شايف هالقفص اللي أنا حاطط حالي فيه.. بتعرف ليش حاطط حالي بالقفص؟! مشان ما تاكلني.. خيو شو بدك بالحكي عاملين حساب  لكل شي.. بس غلطانين.. اللي ما بيعرفك بيجهلك يا أبو سمرا.. يا دبدوب.. إي دبدوب.. أنت رمز العشاق.. بيهدوك للبنات بعيد الحب..  دبدوب حبوب.. كوجو كوجو.. يعليك ما أهضمك .. أنت الحب يا أبو سمرا.. أنت الونس.. العمى شو تونست معك امبارح.. ليلة ولا بالأحلام.. سومو وعسل وسمك وحطب .. العمى صوت سيارات شرطة..  الظاهر اشتغل هالجهاز.. أبو السوم أنا ما رجعت عملت نداء استغاثة.. الظاهر وصلتهن النداءات القديمة قبل ما أتعرف عليك مظبوط ..  قوم افركها أبو سمرا…  ذكرني بالبلم لما وجهنا نداء استغاثة.. نداء قال.. نداءات قول.. روح روح أبو سمراا روووووح… أجوا البشر روح.. أجوا البشر.. ما بتعرف شو ممكن يعملوا معك.. روح لغابتك…. أصلاً ما حدا مكيف غيرك.. عصفور طيار.. ههههههههههههههه طلعت عصفور طيار بالأخير يا دب هههههههه.. أحلى أبو السوم..لا وراك ولا قدامك.. فرصة سعيدة.. كتير انبسطت بالحديث معك.. ما رح أنساك بكل عمري.. واستر ما شفت منّا دخيل عينك.. مو كل أصابيعك سوا ترى ها.. ليك رح اضبضب اغراضي واروح انا كمان.. رح آخد معي هالعسلات لأنو ما بتضمن عنا تلاقي عسل أصلي على طول.. بخاطرك أبو سمرااا..  أجواااااااااااا.. ليكك انتبهت لاصواتهن قبلي يمكن.. مع السلامة …مع السلامة يا أحلى صديق.. يا أحلى أخ.. يا أحلى أبو السوم  بالعالم .. أحلى أبو سمرااا .. وهي عشرين يورو محروقة لعيناك.. واحلى عيون أبو سمراا .. واحلى طاولة ذوق.. وأحلى عيون أبو سمرا ملك الغابات.. وهي كمان أحلى خمسين يورو محروقة.. ورووووووح….  لك مع السلامة.. مع السلامة يا أحلى الناس.. مع السلامة يا أغلى الناس.. مع السلامة .

نبذة عن الكاتب

لقمان ديركي

كاتب وشاعر سوري

Loading Facebook Comments ...