النفر السمين والدب الأسمراني – الحلقة 29

خرج النفر السمين المقيم في فرنسا في رحلة فردية إلى غابات الشمال السويدي وهناك صادف الدب الأسمراني فدخل إلى أقرب قفص من الأقفاص المخصصة لحماية البشر من الدببة في الغابات وأقفل على نفسه قبل أن يبدأ بالحديث مع الدب.

النفر السمين يتابع حديثه مع الدب الأسمراني:

إي .. ليك مو مدحاً فيك ولا لقلقة أبو سمرا.. يعني عم احاكيك الصدق.. ينعل أخته اللي بيزل عليك بحرف.. السمين عنا مهضوم حتى يثبت العكس.. رمز الهضامة وخفة الدم عنا هو السمين.. ورمز الحب عنا دبدوب.. إي وحياتك دبدوب.. بتعرف شو هو الدبدوب مو هيك؟! حكيتلك عنه.. تبع عيد الحب.. اي نفسه..هو نسخة مصغرة عنك.. الدبدوب هو أنت.. بقى باعتبار في نسخة مصغرة منك فأنت موجود بكل غرفة من غرف البنات.. حلم البنت عنا يكون عندها غرفة ودباديب بالغرفة.. تخت صغير وقلوب حب عالحيط ودباديب.. تخيل يا أبو سمرة أنك موجود بغرف كل البنات.. جوك وترتيبك عنا .. بعيد الحب أكبر تجارة هي تجارة الدباديب.. لكان في عنا عيد للحب كمان.. بعيد الحب حضِّر الدب..دباديب لعب .. صور دباديب مع قلوب حمر.. شي ناهي على كيفك.. المهم.. ما عرفت شلون خلصت الرقصة مع أني بالنهاية اندمجت وصرت آخد راحتي وما عاد فكرت باللي حواليّ.. ورجعنا للطاولة .. خلصت السهرة وأجا الحساب قام اسناولت الفاتورة من الكرسون.. ضخمة كتير الفاتورة طلعت.. حاولوا الشباب ياخدوها مني بس أنا ما رضيت.. ودفعنا هداك المبلغ المجقوم يا أبو شريك.. بس نو بروبليم لأني غرقت ببحر الغرام .. صرت اشوفها كل يوم بالقهوة لحالنا.. كانت ترفض تشوفني مع رفقاتي أو مع رفقاتها.. قالتلي أنا تركت رفقاتي كرمالك.. أنت غيرتلي حياتي.. وبلشت تطلب مني اخفف أكل مشان انحف.. وكل يوم صارت تجيبلي وصفات للتنحيف .. شاي للتنحيف.. حزام للتنحيف.. جهاز للتنحيف.. ما عاد خلتني أسهر وأشرب كمان…. قال الشرب بيسمِّن..  ومنعتني من السهر… قالتلي لازم ادير بالي على مصرياتي.. وكانت هي تدفع الحساب أحياناً بالقهوة أو عند محل الصندويش.. قلت لحالي هالمخلوقة أكابر وبتحبني عن جد وشكلها مو شكل خورفة والذي منه، وفعلاً بطلت السهر والبعزقة بفضلها.. بس ما قدرت اخفف أكل.. كنت آكل بالبيت تلات وجبات قبل ما أطلع لاشوفها مشان أقدر آكل معها وجبة وحدة بس وع أساس أني  شبعت..بيوم قالتلي أنت لا رح تقدر تعمل ريجيم ولا شي من هالحكي بقى  لازم تعمل عملية قص معدة مشان تنحف.. بيصير ريجيمك اجباري وما بتاكل غير على قد معدتك.. لك شو قص وما قص.. قالتلي بتطلع ملك جمال.. يالله قوم لآخدك ع بيروت وأعمل لك هالعملية.. وبلشت افكر بالموضوع يا أبو السوم.. صرت أتخيل حالي نازل شي خمسين كيلو دفشة وحدة.. لك صرت اوقف عالمراية اشوف حالي نحيف.. بس تعمل عملية قص المعدة بتصير بتاكل ربع أكلك.. لأنو بتصغر معدتك وما بقى فيها توسع أكل زيادة عن كمية محددة.. وبيصير أخوك السمين رشيق.. لك بيتغير كل موديله.. بيصير شكله من النوع اللي بيقولوا عنه متروس.. هي أقوى من المعبى بتجي.. وأوجب من الناصح أو المليان..

يتبع

نبذة عن الكاتب

لقمان ديركي

كاتب وشاعر سوري

Loading Facebook Comments ...