النفر السمين والدب الأسمراني – الحلقة 21

خرج النفر السمين المقيم في فرنسا في رحلة فردية إلى غابات الشمال السويدي وهناك صادف الدب الأسمراني فدخل إلى أقرب قفص من الأقفاص المخصصة لحماية البشر من الدببة في الغابات وأقفل على نفسه قبل أن يبدأ بالحديث مع الدب.

النفر السمين يتابع حديثه مع الدب الأسمراني:

 .. الجقل عصّْ مصّْ عايف التنكة ووبره مهرهر ودنبه قصير ومشهور بالتخباية بين الجاج.. إي.. الجقل بيتخبى بقن الجاج..  بتعرف الجاج مو هيك؟! الفروج نفسه.. بس شو بدك بالحكي بيضل الفروج شغلة.. وخاصة المشوي.. بتعرف الفروج أنت مو.. هو الجاج نفسه.. يعني الدجاج.. بس بيقولوا له بالسوق فروج.. اسمه الفني يعني.. ويا معلم لو تدوق الفروج المشوي بس.. شغلة ..شغلة كبيرة.. لما بتشوفه وهو وعم يدور مع زملاؤه الفراريج عالسيخ بتجوع بأرضك.. ما في مجال.. بتجوع حتى لو كنت آكل وشبعان من ساعة.. لا يقاوم أبو سمرة .. الفروج المشوي لا يقاوم.. لو بعرف أني رح الاقيك كنت جبتلك معي فروجين تلاتة مشويين.. للأسف هي ما دارتلي.. يا سيدي مرة رفيقي شاعر كتب عنه قصيدة اسمها طائر الفروج.. بيقول بمطلعها: كم أحبك يا طائر الفروج.. يا أيها الطائر الذي لا يطير.. ههههههههههه.. حلوة مو هيك.. بتحب الشعر؟!.. أنا بحب الشعر.. بعشق الشعر.. بس بحب الفروج أكتر.. بصراحة ليش الكذب.. وخاصة المشوي .. هون النفرات أول ما يوصلوا بيسألوك سؤالين: وين بلاقي خبز سوري؟! والسؤال التاني هو: في هون فروج مشوي؟! شغلة.. شغلة يا معلم.. خاصة لما البياع بيلفه بخبز مشروح مدهون بدبس فليفلة وبيعطيك معه صحن كريم توم وكيس مخلل وصحن بطاطا مقلية وبتشتري بطريقك نص كيلو حمص  وجرزة بصل أخضر.. وأمان أمان يا أبو سمرة.. شي ناهي.. نغم.. نغم في حياتي.. وبعدين عملي وموجود بكل حارة.. يعني إذا أجاك ضيف وما بدك تطبخ شي بتنزل بتسناولك فروج أو اتنين وتوابعهن مع صحن حمص جنبه طبعاً بتطلع متغدي أو متعشي أحلى غدا وأطيب عشا.. والشعب مأدمن عليه.. يمكن لولا الفروج المشوي كنا هاجرنا بإرادتنا من زمان.. مو سواح بالصرماية متل ما لك شايفنا هلأ.. نحنا عالليرة تبعنا حاطين صورة نسر .. مع أنو بحياتي ما شفت نسر شخصي بالبلد عنا.. أنا لو بإيدي ما بحط عالليرة غير صورة فروج.. ويفضل يكون مشوي.. حياتنا شي يا أبو سمرة وكتاب القراءة شي..  هيك عايشين.. صار معنا انفصام بالشخصية.. بالمدرسة شي.. وبراتها شي تاني.. إي  منيح لقينا محل فروج مشوي بباريس أول ما جينا.. قول هلأ صار متوفر بكل نفرستان.. عفواً نفرلاند .. أوربا قصدي.. القارة العجوز.. لما بتشيل الجلدة المحمرَّة والمبهرّة من عالفروج وبتاكلها لحالها هيك بدون أي شي تاني بتحس حالك صرت بالفضاء.. شي متل المخدرات يا أبو السوم.. خيال.. طعمة لا تنسى.. بس ما بتنوصف.. قد ما وصفتلك ما بعطيها حقها.. ولما بتقرمش نص الجناح قرمشة قبل ما تكمل عالنص التاني حاف بتكون عملت روداج قبل ما تنطلق.. وبعدين بس تحس حالك جاهز بيجيك صوت من أعماقك وبيقلك: باشر طعام. وبتهجم.. فروج وخبز مشروح مسقسق وحمص وبصل أخضر ومخلل وقرن فليفلة حد .. العالم ملك إيديك.. قول الكون.. الكووووون..

يتبع

نبذة عن الكاتب

لقمان ديركي

كاتب وشاعر سوري

Loading Facebook Comments ...