أقدم الاختراعات من سوريا

بيقول عالم الآثار الفرنسي أندريه بارو : “لكل إنسان متحضر في هذا العالم وطنان، وطنه الأم .. وسوريا” يا ترى شو اللي بيخلي عالم آثار يحكي هالحكي عن سوريا؟ شو اللي قدمته سوريا للحضارة البشرية حتى خلتها وطن تاني لكل إنسان؟

قدمت الحضارة السورية القديمة كتير من الإسهامات بالحضارة البشرية:

أول أبجدية:

سوريا قدمت للعالم أول أبجدية بالعالم… هالأبجدية اللي طوروها الفينيقيين خلال الألفية الثانية قبل الميلاد، وتأثروا فيها بشكل كبير الآراميين والإغريق.

معظم النصوص الابجدية المستخدمة بكل أنحاء العالم بترجع للأبجدية السورية البدائية، يلي اكتشفوها بمدينة أوغاريت الأثرية سنة 1948، وبتتألف من 29 حرف محفور على لوح فخاري، طوله 5.5 سم وعرضه 1.3 سم. وهاللوح موجود اليوم بمتحف دمشق الوطني.

أول نوتة موسيقية:

أول نوتة موسيقية بالتاريخ طلعت من سوريا من أوغاريت بالتحديد أقدم نوتة موسيقية معروفة بالعالم تم اكتشافها بأوغاريت محفورة على لوح طيني، بيرجع تاريخه ل 1400 سنة قبل الميلاد، وفيو أربع أبيات مكتوب باللغة الحورية، وهي النوتة هي السلم الموسيقي لنشيد موجه للإلهة نيكال زوجة إله القمر. بسنة 1979 حاولوا مجموعة من العلماء يفكوا هالنوتة ويعيدوا تدوينها وقدر الباحث السوري راؤول فيتالي يسوي هالشي، وعزفها عالبيانو زميله زياد عجان وبعدها عزفها عدة فنانين سوريين وعالميين.

أقدم ابتكار للسفن:

الفينيقيين السوريين هنن أول مين ابتكرالسفن وصنعها، ومن السواحل السورية طلعت السفن لتنتشر بالعالم كله. بناء السفن بسوريا بيرجع تاريخه تقريباً لبين 1200 و800 قبل الميلاد، وكانت السفن الفينيقية بتتميز بوجود راس حصان على مقدمة السفينة.

أقدم قصة خيال علمي:

أقدم قصة خيال علمي طلعت من سوريا لكاتبها السوري اليوناني لوقيانوس، يلي بيرجع تاريخها بين 200 ل 300 ميلادي تقريباً يعني تمت كتابتها قبل حوالي 1800 سنة وبتحكي القصة عن شخص بيسافر عالقمر عن طريق بربيش مي، وخلال هالرحلة بيصادف مجتمعات غريبة وأشكال حياة مختلفة، وبيحكي كمان بهالقصة عن الحرب بين الكواكب واتصال سكان الأرض بالكواكب التانية.

ومو بس هدول الابتكارات طلعت من سوريا، في غيرها كتير رح نذكر منهم:

أول وجه إنسان محفور على حجر

أول طرق لطحن القمح

أول قالب لصب للسبائك البرونزية

نبذة عن الكاتب

محرر سوريالي

Loading Facebook Comments ...