قناة كرزة على اليوتيوب

أكيد كلنا كأهل منسعى انو نختار مادة جيدة وقيّمة ليتفرجوا عليها أطفالنا، فيتسلوا من جهة ويتعلموا من جهة، مشان هيك قناة “كرزة” على اليوتيوب ما بتسعى انها تسبب الإدمان للطفل، ولا بتستخدم العنف والأصوات العالية الصاخبة أو المشاهد غير التربوية، متل ما بيعملوا بعض القنوات اللي وللأسف بتندرج تحت ستار “قنوات الأطفال”، وإنما وبسبب العمل على تنفيذ المحتوى بشكل احترافي، والاهتمام بجودة المحتوى والشكل، صاروا بيقدروا الأهل يكونوا مطتمنين على أولادهم وهنن عم يتصفحوا اليوتيوب.

فبوقتنا الحالي صاروا أطفالنا عم يتابعوا شئنا أم أبينا قنوات اليوتيوب، وهاد الشي عم يسبب قلق للأهل من الشي اللي ممكن يشوفوه وألادهن، وعم يسعوا ليلاقوا بديل نافع وآمن لأطفالهم، وهاد كان الدافع القوي للتفكير بإطلاق مبادرة قناة “كرزة”، يلي عم يسعوا مؤسسينها لشقّ طريق جديد بقطاع قنوات الفيديو الموجه للأطفال.

وقام بتأسيس المبادرة المهندس أُبَي سكّر، وزوجته الدكتورة الفنانة لين حواصلي، ويلي بيقولوا انو الهدف من انشاء هالمبادرة هو تعليم الأطفال أساسيات اللغة العربية بطريقة علمية وجذابة، وبطريقة تفاعلية بتعتمد عالصوت واللون والصورة، وبيتعلموا من خلالها الأطفال اللغة العربية عن طريق الأغاني، وهي الطريقة بتحبِّب الأطفال باللغة العربية ، وبتساعدهم على تعلمها.

وهادا المحتوى المبتكر والمدروس، والمنتقى بالصناعة التعليمية والترفيهية، عم يتم إعدادو من قبل فريق مختص بعلم نفس الطفل، والإنتاج الإعلامي الموجه للأطفال من خمس دول بالعالم وهي: (الولايات المتحدة الامريكية – فرنسا – تركيا- الإمارات العربية المتحدة – قطر)، وهالفريق عم يقدم أحسن ما عندو بإنتاج المادة التعليمية، والتأليف الموسيقي، وتنفيذ الرسوم المتحركة بتقنية الـ 3D ، بالإضافة لكل شي بيتعلق بالإنتاج الإعلامي.

وبيتطلع القائمين على قناة “كرزة” لفتح آفاق جديدة بصناعة الإعلام الخاص بالأطفال، من خلال إنتاج مرئي بمحتوى قيّم، واللي رح يكون اله دور مهم بتطوير الأطفال من الجانب النفسي والمعنوي والمجتمعي.

مواقع مبادرة كرزة:

http://www.karazahchannel.com/ar/home

صفحة الفيس بوك:

https://www.facebook.com/KarazahChannel/

قناة اليوتيوب:

https://www.youtube.com/c/karazahchannel

نبذة عن الكاتب

محرر سوريالي

Loading Facebook Comments ...