الابتزاز الالكتروني

شو هو ؟؟

هو عبارة عن عملية تهديد وتخويف للضحية، بنشر صور أو فيديوهات أو معلومات حساسة أو خاصة عنه، مقابل دفع مبالغ مالية أو القيام بعمل من نوع معين لصالح المبتزين، متل فضح معلومات سرية خاصة بشخص معين أو بجهة معينة بيكون الضحية بيعرفها وعنده معلومات حساسة عنها

ممكن تصير عملية الابتزاز الالكتروني من خلال برامج هكر بيتم ارسالها للضحية، ووقت بيحاول ينزلها بيقدر الهكر يدخل على معلوماته. والطريقة التانية الاشهر هي الابتزاز عن طريق مواقع التواصل الاجتماعي، وهي الطريقة هي الأشهر نظراً لانتشار مواقع التواصل الاجتماعي واستخدامها الكبير من قبل جميع فئات المجتمع.

طرق الابتزاز: 

  أغلب عمليات الابتزاز بتصير من خلال بناء علاقة بين المبتز والضحية، بعدين المبتَز بيطور هالعلاقة لتوصل للمحادثات عن طريق مواقع التواصل الاجتماعي، وبالمرحلة اللي بعدها بيصير التواصل عن طريق برامج المحادثات المرئية متل الماسنجر والفايبر وغيرهم، وشوي شوي بيستدرج المبتز ضحيته لمحادثة بمحتوى مسيء وفاضح للضحية، وغالبا هاد الحكي بيصير ضمن إطار انو المبتز واقع بغرام الضحية، وبعدما يحصل عالفيديوهات أو الصور المسيئة والفاضحة، أو المعلومات الحساسة، بيصير بيهدده ويبتزه إما بالمصاري أو بطلبات غير أخلاقية متل تسريب معلومات سرية بيمتلكها الضحية.

  طريقة تانية من طرق الابتزاز بتصير من خلال ارسال روابط او طلبات صداقة للضحية، بمجرد الضغط عليها بتتحمل برامج أو فيروسات بتعمل ثغرات بالنظام الإلكتروني للجهاز المستخدم عند الضحية، وبيقدر المبتز من خلالها انو يدخل لجهاز الضحية ويطّلع على المعلومات والصور والفيديوهات وغيرها، وينسخها من جهاز الضحية لجهازه، وبعدين ممكن يساوم عليها، فإما انو بياخدها وبيمحيها من جهاز الضحية وبيصير يبتزو لحتى يرجعلو ياها، او يهددو بنشرها اذا كان المحتوى حساس، وطلب المبتز بيكون اما المال او طلبات تانية لا اخلاقية.

 كيف منتجنب نكون ضحايا للابتزاز الالكتروني ؟؟

 – نتجنب قبول طلبات صداقة من ناس مجهولين واسماء وهمية

 – ما نتجاوب مع اي محادثة من مصدر مجهول بالنسبة النا

 – نتجنب الضغط على أي رابط بيجينا اذا ما كنا واثقين من المرسل

 – عدم مشاركة المعلومات الشخصية مع اي حدا

 – نحمي أجهزتنا دائماً ببرامج مكافحة الفيروسات

شو نعمل إذا تعرضنا لعملية ابتزاز الكتروني؟

 – ما نتواصل مع الشخص المبتز وناخد ونعطي معو قد ما حاول يضغط علينا

 – ما نعطيه اي معلومات مالية متل حساب البنك أو رقم البطاقة البنكية

 – ما نحول اي مبلغ مالي للمبتز

 – خبروا أصدقائكم عن الشي يلي ممكن ينتشر

 – نتوجه للجهات المختصة ونبلغ عن الحادثة “وحدة مكافحة الجرائم الالكترونية” وهنن بيتعاملوا مع الموضوع.

حماية معلوماتنا بالوقت الحالي أمر كتير مهم، مشان هيك لا تثقوا بحدا بسهولة على مواقع التواصل الاجتماعي، ولا تشاركوا معلوماتكن مع اي حدا، لتضلوا بأمان، وتضل معلوماتكن محمية.

نبذة عن الكاتب

محرر سوريالي

Loading Facebook Comments ...