شو بتعرفوا عن كنيس جوبر اليهودي؟

كتير من السوريين ما بيعرفوا عن وجود كنيس يهودي ببلدة جوبر التابعة لغوطة دمشق، إلا لقبل فترة وقت تضرر الكنيس نتيجة القصف على مدن الغوطة الشرقية، بس لهلأ كتار منا ما بيعرفوا شو قصة هالكنيس ومن ايمت موجود، وهل كان في يهود يمارسوا في عبادتهن ولا لأ؟

بحسب كتير من المؤرخين تعتبر بلدة جوبر المكان التاني لليهود بدمشق وضواحيها بعد حي اليهود المعروف بمنطقة دمشق، يلي كانوا يسكنوه اليهود الدمشقيين وكان الهن بالمنطقة معابدهم بحسب الطوائف. وببلدة جوبر موجود الكنيس اليهودي الاكتر شهرة، واللي بيتفقوا كتير من المؤرخين على ان هو أقدم كنيس يهودي بالعالم، وموجود فيه أقدم نسخة توراة بالعالم وأقدم نسخة مكتوبة من التلمود، الكتاب المقدس عند اليهود، وكمان مقام النبي إيلياهو أو إيليا أو إلياس.

وبحسب مرويات يهود دمشق، انو النبي ابراهيم كان غايب عن مكان إقامته المعروف اليوم باسم (الخليل)، وبغيابه  خصومه وسرقوا رزقه وخطفوا ابن أخوه لوط، ووقت رجع وعرف شو صار لحق خصومه مع مجموعة مقاتلين ولاقاهم بجوبر، وهونيك صارت معركة حامية بين الطرفين، انتصر فيها ابراهيم وجنوده وحرر لوط من الأسر. ولحتى يخلّد هاد الانتصار بنى مزار بنفس المكان، وصلى فيه ليشكر ربه على هالانتصار، هالحدث صار بالالف الخامسة قبل الميلاد، بس ضل المكان مزار لليهود من مختلف انحاء العالم.

وبسنة 720 قبل الميلاد، بنى النبي إلياشع المزار بشكله المعروف على قبر النبي إلياهو اللي موجود بنفس المكان، لأنو النبي إلياهو أو إيليا أو إلياس، هرب لهالمكان واتخبى بمغارة موجودة فيه، ليهرب من ملكة السامرة الوثنية إيزابيلا يلي أمرت بقطع راسه (متل مو مذكور بالتوراة)، وبإحدى الروايات أخدت بلدة جوبر اخدت اسمها من هالقصة، لأن المغارة اللي اتخبّى فيها النبي إلياهو كان فيها بئر مياه صغير، والبئر باللغة العربية وبعض اللغات القديمة اسمه (جب) وكون المنطقة كانت غابة أو برية فتسمى المكان (جُب بر) ومع الوقت صارت تنلفظ جوبر، وهاد الجب أو البئر موجود ضمن الكنيس اليهودي.

وبحسب تاريخ ابن عساكر فالمكان عند المسيحيين هو كمان مزار للقديس جاورجيوس يلي هو عند المسلمين وكتير من الطوائف النبي الخضر.

ولهيك هاد المكان مقدس من كتير طوائف كونه أقدم كنيس يهودي بالعالم، وفيه قبر النبي إلياس، ومزار للقديس جورجيوس عند المسيحيين والنبي الخضر عند المسلمين.

نبذة عن الكاتب

محرر سوريالي

Loading Facebook Comments ...