شو بتعرفوا عن نواعير حماه؟

أول شي بيخطر على بالنا وقت نسمع بمدينة حماه هو النواعير، لأنها معروفة بمدينة النواعير، بسبب وجود 17 ناعورة موزعين على ضفاف نهر العاصي..

 شو شغلة هالنواعير؟ وايمت تم بنائهم؟

قبل الميلاد

عبر التاريخ، ابتكروا السوريين طرق وأساليب كتيرة بتتعلق بالزراعة والري ومنها النواعير وأقدم صورة للناعورة لوحة فسيفسائية بيرجع تاريخها للعصر الروماني كانت موجودة بمدينة أفاميا الأثرية القريبة من حماه، وهي موجودة اليوم بحديقة المتحف الوطني بدمشق، وبتمثل ناعورة عم تدور، وقطرات المي عم تنزل من حواليها.

الباحثين بيقولوا أنه النواعير أقدم بكتير من العصور الرومانية، وانها آرامية المنشأ ، لأنو فكرة رفع المي موجودة قبل الرومان، وعالأغلب تاريخ النواعير بسوريا بيرجع ل 2500 قبل الميلاد.

خلال الحكم الاسلامي

في فترات الحكم الإسلامي كان في عمال تابعين للدولة يهتموا بالنواعير، وبفترة الحكم المملوكي والعثماني كان في قائم عليها بيدير شؤونها وبيهتم بتجديدها وتصليحها، وبفترات لاحقة تعطل عدد من نواعير حماه بسبب الحروب والإهمال والتقصير.

بالقرن العشرين

 مع بدايات القرن العشرين صار عدد النواعير أكتر من 100 ناعورة مختلفة القياسات، وكل وحدة الها اسم وكان شغال منها 24 ناعورة، أما بوقتنا الحالي فيه  17 ناعورة شغالة ولساتها عم تستخدم لسقاية الأراضي.

أشهر النواعير

 – البشرية الكبيرة والصغيرة نسبة للشيخ بشر المدفون تحت قبة قريبة منهم

 – الناعورتين العثمانيتين.

 – الناعورة المحمدية وهي أكبر النواعير الموجودة حالياً انصنعت بالعهد المملوكي سنة  1362 ميلادي، قطرها واحد وعشرين متر

 – الناعورة المأمورية الموجودة قريب من متحف حماة بقطر عشرين متر، وهي الناعورة انصنعت بنهاية العهد المملوكي سنة 1453 ميلادي،

 – الناعورة المؤيدية جانب الناعورة المأمورية وأصغر منها انصنعت بالعهد العثماني.

أما الباقي النواعير بيتوزعوا على ضفاف النهر بالمدينة وهنن الجسرية والجعبرية والدهشة واليخضورة والقاق والدوالك والوسطانية والداهونية والكيلانية والطوافرة.

 

 ليش تم بناء النواعير، وليش اهتموا فيها الأجيال اللي أجت لاحقا؟

الهدف من صنع الناعورة إنها تسقي الأراضي اللي حواليها، ومتل ما كتار مننا بيعرف أن  الناعورة عبارة عن دولاب خشبي بيدور حوالين محور مصنوع من خشب الجوز، ومثبت على قواعد حجرية بأسفل النهر.بيتراوح قطرها بين خمس أمتار وعشرين متر، وعلى دايرها في صناديق عددها 50 و120 صندوق.

كيف بتشتغل؟

وقت بتدور الناعورة مع مجرى النهر، بتغطس بالمي الصناديق، وبتطلع معباية مي، وبتنصب بقنوات مائية بتمتد للأراضي. وهيك بتوصل المي من النهر للاراضي اللي حواليه.

منظر الناعورة الساحرعلق أهالي حماه فيها وشد الزوار والسياح وحكوا عنها أهم المؤرخين والرحالة متل ابن جبير، وابن بطوطة، وأبو الفداء، وكل حدا كان يزور حماه ما كان ينسى ياخد صورة عند النواعير.

نبذة عن الكاتب

محرر سوريالي

Loading Facebook Comments ...