كيف منبعد ولادنا عن التطرف

التطرف هو ظاهرة اجتماعية قديمة رافقت العلاقات الإنسانية، وبتتغير وبتطور من زمن لزمن حسب تغير المجتمع وطبيعة العلاقات بالمجتمع الواحد، وبعدة مجتمعات.

التطرف هو الخروج عن المألوف بالمبالغة بالرؤية والسلوك، يعني احتكار المتطرف الفضيلة والحقيقة

 كيف بيشوف حاله المتطرف ؟؟

 – دائماً على صواب، والآخر على خطأ

 – أكتر ذكاء وأعلى مكانه من غيره

 – صاحب الحق بالقيادة

 – غير مستعد لتقبل رأي الآخر أو احترامه.

أنواع التطرف :

التطرف ممكن يكون

 ديني لدين معين (متل مسلم/ مسيحي/ ملحد..)

طائفي لطائفة دينية معينة (متل سني/ شيعي/ كاتوليك/ أرتوذوكس)

عرقي (متل عربي، كردي، أرمني، تركماني..)

جغرافي (متل شامي، حلبي، حمصي، حموي..)

أو على أساس اللون أو اللغة الخ …..

 

شو هي الاسباب اللي بتخلي الانسان يصير متطرف؟

أسباب اجتماعية:

اضطراب العلاقة بين الطفل وأبوه، أو رمز السلطة بالبيت أو المدرسة، هاد الشي بيخلق عند الطفل صراع بيتمثل بعدم الانصياع للقوانين، وبيميل لما يكبر لتكوين مجموعات، أو الانتماء لمجموعات خارجة عن هي القوانين.

أسباب اقتصادية ومعرفية:

بتتمثل بانخفاض المستوى الاقتصادي، لأنه من الصعب على الأسر الفقيرة، يلي بيجتمع مع فقرها تدني المستوى الثقافي والمعرفي، انها تدعم أفرادها وتزودهم بمهارات التكيف، خاصة بوقت الأزمات.

وكمان التغيرات الاجتماعية أو الثقافية أو التكنولوجية السريعة بتأدي لاختلال التوازن وتتداخل القيم والمفاهيم، مشان هيك بيكتر التطرف.

 

الأسباب النفسية:

وهي من أهم الاسباب اللي بتأدي للتطرف في حال وجود بعض الاضطرابات النفسية متل: الاضطراب العصابي متل القلق والاكتئاب، واضطراب  الشخصية البارانوي: واللي بيكون صاحبها متسلط، وبيشوف انو هو لحاله جدير بقيادة وتوجيه الناس، واللي ما بيطيع بإرادتو، لازم ينجبر عالطاعة بالقوة. وكمان الكبت هو واحد من الأسباب النفسيه يلي بتأدي للتطرف، لأنو وجود حالة من الكبت النفسي أو الجنسي بتخلق عند الشخص صراع داخلي بيظهرو برفض القيم والمعايير الاجتماعية يلي بيعتبرها سبب أساس لصراعاته.

أسباب دينية:

والمشكلة هون مو بالدين نفسه، وانما بالتناقض بين تعليمات الدين وممارسات المجتمع بالنسبة للشخص اللي ما تعلم كيف يتقبل الاخر. واللي بيصير ان الشخص بيتعلم مجموعة قيم دينية، بيلاقي المحرمات منها منتشرة بالمجتمع، فبيصير بداخله صراع بيظهر بالعداء للاخر، وبيكون بأعنف حالاته وقت بيحاول حدا يستفز مشاعره الدينية بتسفيه القيم أو الأخلاق او المعتقدات أو الشعائر اللي بيآمن فيها

 وممكن يجتمع عند الشخص الواحد أكتر من سبب من هي الاسباب، وهيك بيكون عنده دوافع أقوى للتطرف.

طيب شو ممكن نعمل؟

:التربية المنزلية

لازم نربيهم على  تقبل واحترام الآخر بكل الحالات والظروف، وبالتالي اذا صارت عندو أي مشكلة من المشاكل السابقة ما رح تطلع على شكل تطرف لأنو هاد الشكل تربى على تقبل الاخر واحترامه.

 أما من الناحية الدينية فلازم نربي الأجيال على أساس الله هو اللي بيحاسب مو البشر اللي بتحاسب بعضها.

مسؤولية الدول:

تنظيم المجتمعات بشكل يقلل من مثيرات التطرف والعنف لأدني مستوى

منع الظلم على المستوى الفردي والاجتماعي

تحقيق العدل والعدالة، ومحاربة الفساد.

 

نبذة عن الكاتب

محرر سوريالي

Loading Facebook Comments ...