كيف نتعامل مع الأطفال ذوي الاحتياجات الخاصة

كتير من الأحيان ممكن نجتمع بالصدفة مع عيلة عندهم طفل وضعه خاص، وبتبدأ التساؤلات السرية أو العلنية وبيظهر التلبك على الوجوه، وهاد الشي ناتج من عدم الوعي والإدراك لطريقة التصرف الصحيحة مع الأطفال يلي عندهم حالات أو احتياجات خاصة، وأحياناً تصرفات الآخرين بتأثر على العيلة ومن الممكن أنه يقرروا ينعزلوا عن الناس ويعزلوا الطفل معهم.

 

ولادة طفل غير سليم بشكل كامل بيعمل هزة للعائلة وردّات الفعل عند الأبوين تختلف من أسرة للتانية وهالشي بيرجع لعدة عوامل:

       نوع المشكلة ودرجتها

       عمر الأبوين ودرجة وعيهم لحالة طفلهم الخاصة

       الوضع الثقافي والاجتماعي والمادي للعائلة

       طريقة تعامل أصدقاء العائلة مع الطفل

من هم الأطفال ذوي الاحتياجات الخاصة؟

هم أطفال بيعانوا من مشكلة بتأدي إلى صعوبات أو عجز سواء كلي أو جزئي من الناحية الجسدية أو العقلية أو اللغوية أو التعليمية، و بيحتاجوا مساعدة من أشخاص او أدوات أو أجهزة ليتكيفوا مع واقعهن، أو ممكن يعتمدوا اعتماد كامل على الآخرين، فممكن أن تكون المشكلة خلقية أو مكتسبة.

لا يمكن  تصنيف كل الأطفال ذوي الاحتياجات الخاصة كحالة واحدة أبداً، فكل حالة لها درجات متفاوتة، فمثلا أطفال متلازمة (داون) بيختلفوا عن أطفال التوحد وبيختلفوا عن يلي بيعانوا من صعوبات التعلم أو إعاقات جسدية أو مشاكل اللغة والنطق.

ماهي أفضل طريقة للتعامل مع الأطفال ذوي الاحتياجات الخاصة وأهله؟

       ما ننظر للطفل بنظرة شفقة نهائياً

       ننبه أطفالنا ونشرح لهم عن الطفل لتجنب نظرة الخوف على وجوههم

       تجنب أي شي ممكن يسبب ردة فعل عند الأطفال كاللمس، الصوت العالي، أو أخذ شي من أغراضهم الخاصة يلي بتعطيهم الأمان

       عدم ذكر تجارب سلبية لاشخاص اخرين بنفس وضعهون أو أصعب

       الاهتمام فيه والسؤال عنه باعتدال، لأنه الاهتمام والمحبة والمشاركة بتوصل وبتساعد كتير لأنهم غالباً بيشعروا بالوحدة.

بس طبعا التعامل الإيجابي من الشخص الغريب ما بيعطي فائدة مرجوة في حال بالأصل كان تعامل الأهل بالبيت خاطئ.

كيف لازم الأهل يتعاملوا مع الموضوع؟

       وجود طبيب مختص أو مسؤول نفسي أو اجتماعي.

       وجود شخص عندو تجربة بحالة مشابهة وبيعرف الصعوبات، أو الانضمام لمجموعات دعم على الإنترنت

       خبروا الأصدقاء والأشخاص القراب عن حالة طفلكم والتطورات الإيجابية أو السلبية

       خبروهم كمان بشكل مختصر شو أفضل الطرق ليتعاملوا مع الطفل ليكون مرتاح

       ما تفقدوا إيمانكم بحالكم ولا بطفلكم، شجعوه حتى لو كان تطوره بطيء

       لا تحملوه أكثر من طاقته

       لا تسمحوا لحدا ينقص من اعتباره أو يستخف فيه أو ينظر له بعين الشفقة أبداً

       إذا كان عند طفلكم تصرفات غير مألوفة بيعملها وهو مرتاح لا تمنعوه عنها بالعكس خلي الناس تتعود عليه

       مثل أي طفل نظافته ومظهره الخارجي وحاجته للحب والحنان واللعب كتير مهمين

       لا تفكروا بالمستقبل بطريقة سلبية وتبنوا ظنون مزعجة ومؤلمة

       لا تحسسوا حالكم بالذنب  وترهقوا أنفسكم بسببه

نبذة عن الكاتب

محرر سوريالي

Loading Facebook Comments ...