نصائح بسيطة قبل وخلال مقابلة العمل

مع الانتشار الكبير للسوريين بالعالم واضطرارهم لتغيير أشغالهم وأعملهم صار من الضروري أنه نعرف كتير منيح كيف نلاقي شغل وكيف نقدم عليه وكيف نتصرف بمقابلة العمل وهي الجزء الأهم لأنه على أساس هي المرحلة بيتم اتخاذ قرار الشركة بالتعيين أو لأ، ولهالسبب لازم تهتم بالمقابلة وتحضر حالك منيح..

 

 

قبل المقابلة:

– تذكر سيرتك الذاتية كتير منيح

– تعرف على اختصاص الشركة و إنتاجها لتعرف حالك وين رايح

 – انتبه لتيابك وخلّيك محتشم وأنيق، وجدير باحترام الناس اللي بدهن يقابلوك

 

صرت جاهز ؟؟!

– حاول توصل قبل موعد المقابلة بربع ساعة، لأن هالشي بيعطي انطباع إنك شخص بيحترم المواعيد

– إذا صار معك ظرف طارئ جداً ورح يأخّرك اتصل بالشخص المسؤول وبلغه

– حافظ على انطباع أول لطيف من خلال أشياء بسيطة مثلا: ابتسم لما تصافح وشد على ايدك بالمصافحة

– خلي أجوبتك مختصرة ودقيقة وبصلب الموضوع ولا تسترسل بالحكي بمواضيع ما لها علاقة بالسؤال

– لا تتصنع طريقة أو أسلوب كلامك وكون عفوي وعلى طبيعتك

– احكي عن نقاط قوتك ولو مرة وحدة بالمقابلة، لأن يلي عم يقابلك بيطمح يوظف الشخص المناسب ويلي عنده نجاحات سابقة، ولا تحكي عن نقاط ضعفك أو مشاكلك الشخصية.

– اسأل أسئلة محضرها من قبل، هالشي بيعطي انطباع عن اطلاعك على الشركة، وانك صرفت وقت وجهد لتتعرف عليها، واحكي كأنك جزء منها

– لا تستعجل بالحكي عن الراتب والإجازات، لأن صاحب العمل عم يدور على حماسك للوظيفة، ونشاطك وحيويتك، مو عن طمعك بالراتب.. لازم تحكي بس بالوقت المناسب يلي اكيد مو بالنص الأول من المقابلة.

نبذة عن الكاتب

محرر سوريالي

Loading Facebook Comments ...