أشهر أفلام السينما السورية 2 – قصاقيص أيام اللولو 73

دائماً بيحكوا المثقفين السوريين عن أزمات بالمسرح والسينما، أزمات امتدت على طول سنوات أيام اللولو، من الستنيات للتسعينات. انعكس هاد الشي بشح بالانتاج بمجالات ثقافية متل السينما، أو تواتر غير منتظم بمجالات تانية. بهدول الحلقتين من قصاقيص أيام اللولو رح نستعرض قائمة بأشهر عشر أفلام بأيام اللولو، فيا ترى بتوافقونا على اختياراتنا!

بهي القائمة عم نحاول نذكر بأشهر الأفلام يلي طلعت بهي الفترة، وسببت ضجة أو أخدت شهرة .. بدون ترتيب .. وماننا بصدد تقييم الأفضل أو مين يلي حصد جوائز أكتر.

أو عالساوندكلاود

 – – – –

الليل

للمخرج السوري الكبير محمد ملص، الفيلم يلي تم اخياره وتصنيفه من قبل كتير من النقاد والمؤسسات كواحد من أهم الأفلام العربية، طلع لصالات السينما بسنة 1993. وبيحكي عن القنيطرة يلي هي المدينة يلي نشأ فيها ملص.

الحدود

من انتاج بسنة 1984 كان من الأعمال يلي أجت كنتيجة للشراكة بين الماغوط ودريد لحام.  ويلي كان سخرية من مفهوم الحدود العربية، وانشهر كتير بهديك الفترة عدد كبير من الجمل وبالأخص جملة شرقستان وغربستان.

سائق الشاحنة

كان من أول أفلام المؤسسة العامة للسينما.. على الرغم من أنه مخرج الفيلم بوشكوفتشينكش ما كان سوري، إلاّ انه كان انطلاقة للمؤسسة مع طاقم العمل يلي بيشمل خالد تاجا وهالة شوكت وصبري عياد وعبد اللطيف فتحي وبسام جبري..

أموت مرتين وأحبك

بعيداً عن النوع الفني يلي استعرضناه لهلأ بيجي فيلم أموت مرتين وأحبك ويلي كان من بين الأفلام يلي تركت كتير من الجدل وكان لمشاركة الممثلة السورية الشهيرة إغراء دور كبير بهاد الجدل، مع عدد من المشاهد الجريئة.

الكومبارس

فيلم الكومبارس للمخرج الكبير الراحل نبيل المالح، يلي فات على صالات السينما بنسة 1993. الفيلم نال مديح هائل من النقاد، أغلب التصوير تم داخل استديو الرواس، بديكور داخلي، واعتمد بشكل أساسي على شخصيتين، أداهم بسام كوسا وسمر سامي.

نجوم النهار

الفيلم السادس بهي القائمة فهو رائعة أسامة محمد نجوم النهار. الفيلم يلي كتير من النقاد بيعتبروا أنه ما أخد حقه بسبب المنع يلي لحقه بشكل غير مباشر من المؤسسة السياسية والثقافية بسوريا.  انتج بين 1987 و1988 وانشاف بكتير من المهرجانات، بس للأسف منع من عرضه لسنين طويلة بسوريا خلال أيام اللولو ..

رجال تحت الشمس

الفيلم  السابع هوه فيلم رجال تحت الشمس، نال شهرته مو بس من الفيلم بل من القصة الرائعة للكاتب الفلسطيني الشهير غسان كنفاني. والظرف السياسي المحيط، الفيلم حاصل على الجائزة الذهبية بمهرجان قرطاج للأفلام العربية والأفريقية سنة 1973 وتم  اختياره كواحد من أهم 100 فيلم سياسي بتاريخ السينما العالمية.

رسائل شفهية

الفيلم التامن بهي القائمة هو فيلم  رسائل شفهية، تم انتاجه بين 1990 و1991، كان ضمن مجموعة كبيرة من أفلام السينما السورية يلي شهدت نهضة بهديك الفترة، وكان علامة بالسينما السورية.. مع قدرة المخرج عبد اللطيف عبد الحميد بهداك الوقت على جذب المتفرج بقصص بسيطة، وحكايات محبوكة بحرفية عالية.

كفرون

الفيلم التاسع هو الفيلم التاني على القائمة للمثل السوري دريد لحام فيلم كفرون، وسبب نيله للشهرة هوه شهرة لحام بالدرجة الأولى بهداك الوقت. ومحاولة من شركات الإنتاج الخاصة للعودة للسوق السورية مع شركة إنتاج نادر الأتاسي، يلي كان قطب مهم بعالم الإنتاج. بالإضافة لتوجهه ليكون فيلم للعائلة.

الفهد

آخر الأفلام بقائمة اليوم هو فيلم تم اختياره كواحد من أهم 100 فيلم بالسينما الآسيوية.. وهوه فيلم الفهد، الفيلم التاني على قائمة اليوم للمخرج السوري الراحل نبيل المالح.

بيعتبر كتير من النقاد أنه هاد الفيلم كان من الأفلام يلي أسست للسينما السورية يلي عرفناها خلال سنين طويلة من أيام اللولو.  الفيلم يلي فاز بالعديد من الجوائز العالمية بالسبعينات، كان من بطولة فيه كل من الممثلة الشهيرة إغراء والممثل أديب قدورة، وعن قصة للأديب السوري الكبير حيدر حيدر.

نبذة عن الكاتب

عمرو سواح

معد ومقدم برامج في راديو سوريالي .ناقد مسرحي وكاتب ومحرر. يقيم حالياً في مدينة بوردو

Loading Facebook Comments ...