أنا وسيلفي، كيف صنعنا المكدوس 30

خلصت الأيام تبع المكدوس، صار لازم تشيله من تحت الضغط، أو ترجع تجلسه إذا كنت قالبه على راسه، وبس يصير يمشي زحف، أو على إيديه كب فوقه الزيت، اطمره بزيت الزيتون الصافي، وتسمَّعلك على شي موال لوديع الصافي..

ـ صافي يا لبن؟!
ـ صافي والجو دافي
ـ صار شوب
ـ فقس اللبن
ـ صار برد
ـ انكمش اللبن
ـ صار اعتدال
ـ ماتت نوال
ـ صار تسويات
ـ بمشفى المواساة
ـ قالوا اللي بقلبهن


ـ من القهر البني آدم بيقول
ـ وما بيطول
ـ حظه قصير
ـ بس بينط
ـ قد ما نط
ـ جبل عالي
ـ تسلم
ـ جبل بينط
ـ تغيير ديمغرافي
ـ كيف بدنا نسب جبله؟!
ـ صار بالسهل
ـ سب سهله
ـ طول بالك لسه ما صار أله
ـ أهم شي عدم الإعتراف
ـ بشو؟ّ
ـ بالإنخطاف
ـ مشحوطين
ـ ممعوطين
ـ ممعوسين
ـ مأكولين
ـ مبيوعين
ـ مقتولين
ـ بلا كلمات عنيفة رجاءً
ـ حابب اصير ثوري
ـ إي مو على دوري
ـ حابب اصير إنسان
ـ ليش بشو قصرت معك يا حيوان
ـ أنت الحيوان
ـ كول هوا واخرس
ـ طولوا بالكن يا شباب
ـ مين هاد؟
ـ مراسل حربي
ـ شو جابه لعنّا؟
ـ شاف خناقة وأجا
ـ وليش مشهور
ـ بسبب الجمهور
ـ شو شغلته؟!
ـ فض نزاعات
ـ وفض؟!
ـ هو فض بس من يومين كمان هو انفض
ـ عن شو انفض؟
ـ عن حاله
ـ كم واحد صار
ـ تلاتة
ـ ونحنا كم واحد صرنا ؟
ـ نحنا تنين

أنا وسيلفي، كيف صنعنا المكدوس 30

ـ أيام بنصير أربعة؟
ـ إي من أجل برتية تريكس
ـ لا تطرنب على أصي
ـ أنت ما عندك أص
ـ كم طرنيبة معك أنت؟!
ـ ولا وحدة
ـ لكان لا تاكل ختياري الدينار
ـ ما معي أص الدينار
ـ لا تاكل بنت الكوبا
ـ أعلى شي عندي شبّ الكوبا
ـ لا تاكل عشرتي الكوبا
ـ خلص بكبه للشاب فداك بلطش بستوني
ـ كبه بلطش سبات شجرة أحلى
ـ سنَك؟!
ـ إي دق عالتنك
ـ صار ووجب
ـ صاير متمرد!
ـ الدق عالتنك مو تمرد
ـ لكان شو؟!
ـ شكر السماء على نعمة المعادن
ـ وكفتت علينا المعادن
ـ من المعادن
ـ وطار الحجر
ـ وخفس الطين
ـ ونشف النهر
ـ وغرق السمك
ـ وفاض النهر
ـ وغرقت البشر
ـ واللي ما غرق بالنهر غرق بالبحر
ـ واللي ما مات بالبرميل مات بالزنبيل
ـ واللي ما انكمش بمقدونيا انكمش بالمجر
ـ شو الحل؟
ـ نتوفّى
ـ موتة ربنا أحسن الشي
ـ طموح عالي المستوى
ـ جبل عالي
ـ تسلم يا غالي
ـ بصحة الغايبين.


ـ بصحتنا
ـ صار بدها مكدوس
ـ إي صحتين
ـ ما عم تنمعس معي بالخبزة
ـ حط القطرميز بهالحالة عالشمس ساعتين
ـ تعريض للضوء والا للحرارة؟!
ـ ههههههههههههههههه لا هيك ولا هيك. مجرد عادات وتقاليد.

تمت

نبذة عن الكاتب

لقمان ديركي

كاتب وشاعر سوري

Loading Facebook Comments ...