قرار محكمة العدل الأوربية المتعلق بمنع الحجاب وتأثيره عالمحجبات بأوروبا

شو صار؟

أعلنت محكمة العدل الأوروبية اليوم حكمها بقضيتين، وحدة من فرنسا والتانية من بلجيكا، القضيتين رفعوهن موظفات محجبات تم فصلهن من العمل بسبب ارتداء الحجاب. سميرة كانت بتشتغل بشركة بلجيكية لمدة ثلاث سنوات، وتم طردها بعد ارتدائها الحجاب. وأسماء كانت محجبة بالأصل وبتشتغل بشركة برمجيات واشتكى عليها أحد العملاء لأنها محجبة، فطلبت منها الشركة خلع الحجاب أثناء العمل بس هي رفضت وتم فصلها من العمل.

على أي أساس تم الفصل من العمل وشو كان حكم المحكمة؟

بالحالتين كان سبب الفصل هو سياسة الشركات يلي بتمنع الموظفين من إظهار أي رموز دينية أو سياسية أو أيديولجية داخل أوقات وأماكن العمل، والحجاب يعتبر أحد هي الرموز. الموظفتين رفعوا دعاوى قضائية بسبب الطرد التعسفي يلي اتعرضوله. قرار المحكمة اليوم وجد أنه من حق الشركات الخاصة حصراً (لا ينطبق القرار على المؤسسات العامة والحكومية) أنه ترفض توظيف المحجبات إذا كان هاد الرفض ضمن سياسة عامة بمنع الرموز الدينية ضمن مكان العمل، وبوجود دليل يثبت تأثر العمل بسبب هاد الرمز.

شو تأثير هالقرار على حياة المحجبات بأوروبا؟

– نظرياً ما في أيا قوانين جديدة بمنع الحجاب، لا على المستوى الأوروبي ولا على مستوى الدول الأعضاء بالاتحاد الأوروبي.

– هيك نوع من قرارات المحكمة بتكون موجهة لتفاصيل معينة وحالة خاصة، يلي هي حالة القضية المرفوعة، يعني مو بالضرورة تكون معممة على كل القضايا الشبيهة ولا بالضرورة تكون أقوى من القوانين الداخلية لكل بلد أوروبي.

– لكن قرار المحكمة هاد يمكن استعماله كسابقة قانونية بغير قضايا، يعني ممكن الإشارة له بحالات مشابهة وممكن يقوي موقف جهات تانية عملت حالات طرد شبيهة.

سجال مستمر

هاد الموضوع إشكالي بأوروبا وبحالة سجال دائم، البعض بيقولوا أنه في تشديد خاص على المسلمات المحجبات بالوقت يلي ما بتم الاعتراض على بعض الرموز الدينية الأخرى، وإنه الحجاب مختلف عن باقي الرموز الدينية كونه مانه مجرد تفصيل شكلي أو جمالي. وكتار بشوفوا أنه هاد القرار رح يشكل صعوبة مضافة على فرص المحجبات بالتوظيف.

بالمقابل فيه معارك رابحة متل ما صار ببرلين الشهر الماضي، لما غرّمت محكمة العمل ولاية برلين لأن ما سمحت لمعلمة محجبة اتدرس فيها، والسنة الماضية أحد المحاكم الإدارية بولاية بافاريا الألمانية أخدت صف محامية متدربة ضد محاولة منعها من ارتداء الحجاب ضمن مكان العمل.

 

نبذة عن الكاتب

محرر سوريالي

Loading Facebook Comments ...