أساطير الحمل!!

الإشاعات والأساطير ممكن تصير حول أي موضوع بالعالم، حتى عن الحمل بتصير كتير من الأساطير والأخبار والقيل والقال، فما تستغربي كل يوم تجي رفيقتك تقلك عملي هي ولا تعملي هي، وتربطها بموضوع الحمل. وكمان ممكن وإنتي فاتحة الإنترنت تطلع معك شي صفحة ع الفيسبوك عم تقدملك نصايح عجيبة غريبة تصلح أنو تتسمى أساطير. واليوم راح نخبرك عن أكتر أساطير متداولة بين الناس عن الحمل واللي راح يبلشوا بتقديمها إلك ع أساس إنها نصائح.

  1. لازم تاكلي عن تنين، هي أشهر نصحية أو أسطورة وكل العالم راح تقلك ياها. وطبعا هالشي غير صحيح لكن لازم تحسني نوعية الطعام اللي بتتناولي ليصير يحوى عناصر غذائية أكتر بتكون مفيدة للجنين.
  2. ريحي حالك وخليكي كل الوقت متسطحة. طبعا هي كمان من النصائح المؤذية للسيدة الحامل اذا ماكان في عارض طبي انتي بتقدري تمارسي يومك بشكل طبيعي بس لازم تزيدي وقت الراحة لكن مو طول النهار تبقى متسطحة.
  3. تطلعي بناس حلوين ليطلع البيبي حلو ولا تتطلعي بناس بتكرهيهون لانو بيطلع البيبي بيشبهون، طبعاً مافي عاقل بيصدق هالحكي بس بالمقابل حالك النفسية هي من الشغلات اللي بتأثر على الجنين لهيك حاولي تكون بصحة نفسية جيدة.
  4. لا ترفعي إيديك فوق راسك، لا تتحركي كتير أثناء النوم، لأن هاد الشي بيتسبب بلف الحبل السري حول رقبة الجنين وبأدّي لاختناقه. طبعا هي المقولة مالها أي أصل من الصحة، وغير معروف أصلها بس متداولة بين كتير من الناس.
  5. الحموضة أثناء الحمل سببها انه البيبي شعره طويل و غزير، الهرمونات و ارتخاء عضلات الجهاز الهضمي اثناء الحمل بتسبب الشعور بالحموضة، القصة ما لها علاقة بالطفل المسكين وشعراته!
  6. الولادة بالشهر السابع هي احسن من الولادة بالشهر الثامن، ابداً مو صحيح، كل يوم إضافي بيبقى فيه الولد بالرّحم هو بالتأكيد أفضل له ولاكتمال وظائفه الحيويّة.

لسا في كتير اشاعات وأساطير عن الحمل لتعرفوا عنها أكتر فيكون تسمعوها من هون.

نبذة عن الكاتب

معدّة ومخرجة برامج براديو سوريالي. ديمة خريجة فنون وإعلام، مقيمة حاليّا ببرلين،ألمانيا، "بحب القراءة كتير ومتل كل فريق سوريالي بحب السفر والطبخ! بعرف انه للي جاية أحلى لأن كتيرين للي عم يشتغلو كرماله"

Loading Facebook Comments ...