بلشنا الجدّ!!

بعد ما نكتشف الحمل وبعد بفترة بيبلش بالأسبوع الخامس في كتير أعراض للحمل بتواجهها السيدة الحامل وغالبا بتستمر هالأعراض أول تلات شهور من الحمل واللي بتنوصف بأنها أصعب فترة من فترات الحمل، كمان لازم يعرف الزوجين أنو خلال هالفترة بتكون نسبه الإجهاض عالية بتوصل لحد الـ 25% يعني سيدة من كل أربع سيدات، مع الإشارة أنو 90% من حالات الإجهاض ما لها دلالة على أيّة مشاكل صحيّة عندك أو عند زوجك، لكن تعرّضك لإجهاض مرّات متكررة، بيستدعي بالتأكيد فحوصات ورعاية طبيّة خاصّة.

وبهالفترة كتير مهم تبلشي تاخذي الفيتامينات والمكملات الغذائية الخاصة بالحمل واللي بتحتوي بشكل أساسي على حمض الفوليك اللي بيساهم بحماية الجنين من التشوهات خاصة العقلية منها.

أغلب الأعراض اللي راح تواجه السيدة الحامل راح تكون بسبب الهرمونات.

متل ماذكرنا سابقا انو بهالفترة راح تكون بداية أعراض الحمل الصعبة وهي أعراض طبيعية بتصير مع أغلب السيدات الحوامل واهم خمس أعراض هني:

  1. النوم، راح تصيري تنامي كتير وتصير الفيقة الصبح صعبة شوي.
  2. لعية النفس. تماماً متل ما منشوف بالمسلسلات، راح يصير يرافقك هالعارض فترة من الزمن.
  3. الحساسية تجاه الروايح. يعني ممكن تحبي روايح جديدة وما عاد تطيقي تشمي روايح معينة كانت عادية بالنسبة إلك قبل الحمل.
  4. الدخول للتواليت بشكل متكرر وأكتر من المعتاد لأنو الرحم عم يكبر ويضغط ع المثانة.
  5. ألم الثديين. فمن الممكن تشعري بحكة أو ألم أو حتى يتغير حجم الثديين وهالشي بيكون بيسبب الهرمونات اللي بتكون عم تزيد بهالفترة.

ولسا في أعراض تانية منحكي عنها تباعاً، ولأخد العلم أنو أغلب الأعراض اللي راح تواجه السيدة الحامل راح تكون بسبب الهرمونات.

لمعلومات أكتر فيكون تسمعوا تسع شهور من هون.

نبذة عن الكاتب

معدّة ومخرجة برامج براديو سوريالي. ديمة خريجة فنون وإعلام، مقيمة حاليّا ببرلين،ألمانيا، "بحب القراءة كتير ومتل كل فريق سوريالي بحب السفر والطبخ! بعرف انه للي جاية أحلى لأن كتيرين للي عم يشتغلو كرماله"

Loading Facebook Comments ...