ألف طبخة وطبخة 25 – السفسوف

شوفوا الفيديو كمان عاليوتيوب أو عالفيسبوك أو نزلوه مباشرة

أنا يارا من مدينة سلمية، ومقيمة بأميركا، راح احكي عن القريموطة. اسمائها بتختلف من مدينة لتانية إلا أنها موجودة بتنويعاتها عند كل السوريين بطرق ومسميات مختلفة، بللة برحيبة القلمون، جَرْش بمعضمية القلمون، بيبرود والنبك سفسوف، بدير عطية المغطوط. يُفرك البرغل بسمن، وينقع بمزيج رب البندورة والتوم والبقدونس وماء مغلي. أما بالكردي دانشيكة، متل الأنطكلية، وبتتاكل بورق العنب الزغير المسلوق. عند السريان بالجزيرة اسمها جمردوك. وبالتركي كيسيرKisir، بلواء اسكندرون وانطاكية اسمها نموش ويُنقع البرغل بدبس البندورة والفليفلة، بالغسانية بجسر الشغور بيسموها مجبولة، بمصياف والقدموس بيسموها الفريفيرة، بالوادي بيسموها قريميطة أو قريموطة. نفس مكونات التبولة مع برغل أكتر مطبوخ ومحمص، وخضرة أخشن ودبس رمان. بياكلوها مع ورق الملفوف التازة بدال ورق العنب للتبولة. منيقيعة بالساحل السوري وتُنقع بعصير حصرم والباقي خلطة تبولة، مقيريطة بريف حمص الشرقي وتنقع بلبن.

القريموطة فبتذكرني ببيت عمتي لإنها من أساسيات العصرونيات ووجبات بعد الظهر بمدينتي، ومحور جمعات العيلة والرفقات.
الأكلة مرتبطة عندي بعمتي وبنات عمتي ومع ريحتها بتذكر الأسطوح بوقت الصيف ببيتهم بسلمية. وعلاقتنا أكيد لسا منيحة وعلى تواصل وكل ما وحدة مننا طبختها بنبعت صور لبعض مع الأشواق.

ما في شي بيغيرنا وبيبعدنا عن بعض وهي الاكلة من الأكلات الي عندي استعداد أعملها وآكل منها كل يوم وبلتزم بالطريقة التقليدية لتحضيرها مع الكثير الكثير من الليمون.

المكونات

  • كاسة برغل ناعم مغسول
  • جزرة بصل أخضر مفروم
  • جرزة نعنع
  • جرزة بقدونس مفروم ناعم
  • خيار مقطع ناعم
  • خس مفروم ناعم
  • حبتين بندورة
  • بهارت مشكلة وشطة وملح
  • وملفوف للتغميس

طريقة التحضير

  1. منحط كاسة البرغل المغسول بزبدية غميقة ومنضيف عليها عصير الليمون والبهارات والملح.
  2. منضيف البندورة والبقدونس والنعنع ومنحرك.
  3. منضيف البصل الأخضر المفروم والخيار والخس المفروم والبهارات المشكلة والشطة وزيت الزيتون ومنحرك.
  4. فينا ناكل أكلتنا بالمعلقة او نغمسها بالملفوف او الخس.

وصحتين وهنا

نبذة عن الكاتب

إياد كلّاس، شريك مؤسس ومدير البرامج في راديو سوريالي. إياد مدير مشاريع، مدرب ومحاضر، خبير في ميدان ريادة الأعمال، ناشط في مجال المناصرة لحقوق الإنسان والإعلام، بالإضافة لكونه عضو مجلس إدارة في جمعية "رؤية لغد أفضل" يحمل شهادة الماستر من جامعة "بول سيزان"، ومقيم حالياً في بوردوه - فرنسا "عندي حلم إني أسمع سوريالي في أحد مقاهي أي مدينة صغيرة في سوريا، يوماً ما ... قريباً جداً"

Loading Facebook Comments ...