ألف طبخة وطبخة 23 – فتة الجاج

شوفوا الفيديو كمان عاليوتيوب أو عالفيسبوك أو نزلوه مباشرة

أنا روض الخطيب شوتس من الشام ومقيمة بمانهايم، ألمانيا وهي ذكرياتي مع فتة الجاج اللي ريحتا بتذكرني بالدفا! بتذكر رفيقتي هندة أتاسي، صديقتي القريبة للقلب، بغرفة السفرة ببيتها بالجسر الأبيض، كنا نرجع سوا من الشغل جوعانين وما اقدر كنت استنى لتوصل الأكلة عالطاولة. كانت أحياناً تعزم بقية الشلة من رفقاتنا والكل يأكل أصناف تانية وأنا ضل آكل منها لتخلص! مشان هيك هالأكلة بتجيب زكريات حلوة وصور لعالم كانت مبسوطة وصوت هندة! “هالاكلة بتجيب دفا.” هندة صارت اليوم بكندا ولازلنا على تواصل. إلي زمان ما أكلت هالأكلة لأنو ما بعرف اعملها متل رفيقتي ومابدي أكلها لحالي. للأسف ما بعملها اليوم. لانو بلا ناس وجمعة كبيرة مابستطيبها.

المكونات

  • 400 غ دجاج مسلوق
  • سنين توم
  • كاسة رز
  • رغيفين خبز مقطعين
  • نص كيلو لبن
  • نص كاسة عصير ليمون
  • معلقتين طحينة
  • رشة بقدونس مفروم
  • زيت قلي
  • ملعقة سمنة
  • ملح، فلفل، شطة

طريقة التحضير

  1. منقلي الرز بشوية زيت زيتون ومنضيف عليهون كاسة ونص مي ومنتركهون على نار خفيفة.
  2. منتبل الخبز المقطع بشوية زيت ومندخلوا على فرن بدرحة حرارة 180 لمدة 10 دقايق.
  3. منسلق الدجاج ووقت السلق منضيف المطيبات ومنقش الزفرة اللي بتطلع ع وش الطنجرة.
  4. منحط معلقتين طحينة ومنضيف عليها الليمون والتوم واللبن ومنخفق المزيح.
  5. بصينية التقديم منصف الخبز المحمص وفوقو الرز ومنسقيهون بشوية مي من مية السلق ومنصف فوقهم الدجاج المسلوق وبعدين منضيف البدوة ومنزين صينية التقديم بالشطة الحمرا والفلفل والبقدونس المفروم.
  6. منحمي سمنة ومنلقي فيها قلوبات ان وجدت ومنطشها ع الوش.

وصحة وهنا.

نبذة عن الكاتب

إياد كلّاس، شريك مؤسس ومدير البرامج في راديو سوريالي. إياد مدير مشاريع، مدرب ومحاضر، خبير في ميدان ريادة الأعمال، ناشط في مجال المناصرة لحقوق الإنسان والإعلام، بالإضافة لكونه عضو مجلس إدارة في جمعية "رؤية لغد أفضل" يحمل شهادة الماستر من جامعة "بول سيزان"، ومقيم حالياً في بوردوه - فرنسا "عندي حلم إني أسمع سوريالي في أحد مقاهي أي مدينة صغيرة في سوريا، يوماً ما ... قريباً جداً"

Loading Facebook Comments ...