الف طبخة وطبخة 21 – الغلنش

شوفوا الفيديو كمان عاليوتيوب أو عالفيسبوك أو نزلوه مباشرة

أنا إيمان النابلسي من القنيطرة مقيمة بالأردن وهي ذكرياتي مع الغلنش. وهي أكلة شيشانية من عجين طحين القمح والذرة المفتول بطريقة خاصة والمطبوخ بمرق الدجاج اللي ريحتا بتذكرني لما كان عمري 8-9 سنين وأمي كانت تطبخها ببيتنا بالقنيطرة. وتعزم عليها الأقارب، من أهل ابي وعماتي. كان كمان يجو الجيران لياكلو هي الأكلة الشيشانية الغريبة. وبعد الأكل كانت عمتي تعزف عالعود. وكانو كل النسوان الموجودين يغنو أغاني لأم كلثوم مرات ولعبد الوهاب، كان عنا واحد من ثلاث أو أربع تلفزيونات موجودة بالقنيطرة والجيران يجوا يتجمعوا ليحضروه وهنن وعم يشربوا شاي ويفصفصوا بزر، بتذكر كمان حرب 1967 لما الاسرائيليين طالعونا من بيوتنا وجمعونا بكنيسة وصفو الرجال بجنب والنسوان بجنب وفرزونا ع حي معين. وكل كم عيلة ببيت وأخدو بيوتنا وسرقوها وبعدين هدموها. جدي كان عندو حارة كاملة بالقنيطرة بس كلها راحت وكانت هالحارة بحي الشركس.

اليوم بطبخها وبنتي صارت تعملها أحسن مني.. بالنسبة إلي الطبخة هي ما عاد تعنيلي كتير وماعادت النكهة متل قبل.

المكونات

  • 250 غ صدور دجاج
  • 500 غ معكرونة نوكي بدال عجينة الغلنش
  • بهارات، ورق غار، بهار حلو، هال، فلفل أسود، بصل
  • لتر مي
  • 5 سنان توم
  • ملح

طريقة التحضير

  1. منسلق صدور الدجاج ومنضيف معها المعطرات بعد ما يغلي الدجاج ومنقش الزفرة.
  2. بمرقة الدجاج منسلق المعكرونة النوكي لمدة 20 دقيقة ومنصفيها.
  3. مناخد من مرقة السلق ومنضف عليها توم
  4. منصفي المعكرونة النوكي ومنحطها بطبق التقديم ومنجللها بالدجاج المسلوق.

صحتين وهنا

نبذة عن الكاتب

إياد كلّاس، شريك مؤسس ومدير البرامج في راديو سوريالي. إياد مدير مشاريع، مدرب ومحاضر، خبير في ميدان ريادة الأعمال، ناشط في مجال المناصرة لحقوق الإنسان والإعلام، بالإضافة لكونه عضو مجلس إدارة في جمعية "رؤية لغد أفضل" يحمل شهادة الماستر من جامعة "بول سيزان"، ومقيم حالياً في بوردوه - فرنسا "عندي حلم إني أسمع سوريالي في أحد مقاهي أي مدينة صغيرة في سوريا، يوماً ما ... قريباً جداً"

Loading Facebook Comments ...