ألف طبخة وطبخة 20 – الشاكريّة

شوفوا الفيديو كمان عاليوتيوب أو عالفيسبوك أو نزلوه مباشرة

اسمي نور أبو أنس، من دوما، الغوطة الشرقية، دمشق. ومازلت مقيم بدوما، لما بقول شاكرية ورز أول شي خطر ببالي جمعة الأهل على سفرة وحدة بتذكر السوالف اللي كنا نفتحها عالسفرة ونضحك كلنا سوا ونشارك بكل شي من تحضير الأكل أو السفرة.

هالأكلة مرتبطة بأهلي، وحاليا كل شخص بمكان. شي خارج سوريا وشي لسا جوا يعني مشردين وهالأكلة مرتبطة ببيت العيلة. هالمكان هلأ صار مهجور وطبعاً هالأكلة مرتبطة دائما بأول يوم بالعيد. طبعا العلاقة تغيرت هلأ لأن تشردنا وحاليا ما بنطبخها لأننا محاصرين بالغوطة ومافي المواد اللازمة لنطبخها.

أكيد ما بنغير شي بالوصفة لأن اذا غيرنا شي فيها بتتغير الذكريات، بنضيف عليها بس المحبة والبسمة.

المكونات

  • 500 غ لبن
  • 3 بصلات مقطعين جوانح
  • 200 غ لحمة موزات
  • بيضة
  • معلقة نشاء
  • بهار حلو، ورق غار، عود قرفة، بصل
  • ملح
  • ماء
  • ملعقتين زبدة او سمنة

طريقة التحضير

  1. منسلق اللحمة الموزات بطنجرة، ومنقش الزفرة اللي بتطلع وقت السلق، ومنضيف عليهون المعطرات، ورق الغار والبصل والبهار الحلو والقرفة.
  2. منقلي البصل المقطع جوانج بشوية زبدة أو سمنة يصير شفاف ومنضيف ع البصل اللحم المسلوق وشوية مرقة ومنغليهون سوا.
  3. منضيف البيضة ع اللبن والنشاء المدوب بالمي ومنخفق اللبن ع البارد بعدين منحط اللبن ع نار متوسطة مع التحريك الدائم ليبلش يغلي منضيف اللحم والبصل مع المرق ومنحرك.
  4. بتتقدم هالاكلة مع البرغل او الزر بشعيرية.

وصحتين وهنا.

نبذة عن الكاتب

إياد كلّاس، شريك مؤسس ومدير البرامج في راديو سوريالي. إياد مدير مشاريع، مدرب ومحاضر، خبير في ميدان ريادة الأعمال، ناشط في مجال المناصرة لحقوق الإنسان والإعلام، بالإضافة لكونه عضو مجلس إدارة في جمعية "رؤية لغد أفضل" يحمل شهادة الماستر من جامعة "بول سيزان"، ومقيم حالياً في بوردوه - فرنسا "عندي حلم إني أسمع سوريالي في أحد مقاهي أي مدينة صغيرة في سوريا، يوماً ما ... قريباً جداً"

Loading Facebook Comments ...