ألف طبخة وطبخة 19 – كنافة عصمليّة

شوفوا الفيديو كمان عاليوتيوب أو عالفيسبوك أو نزلوه مباشرة
أنا ميس من دمشق مقيمة بهامبورغ، ألمانيا، الكنافة العصملية بتذكرني بالسهرة ببيت خالتي، كان زوج خالتي يحضرها وقت عطلة نص السنة وتجتمع العيلة كلها ببيتهن بمدينة أريحا بجبل الأربعين. ببالي غرفة القعدة ببيت خالتي و الأهل والولاد مجموعين وعم يتفرجوا عالتلفزيون، او عم يتناقشوا بشي قصة، وكم ولد عم يلعبوا شدة بالزاوية.

ماعاد شفت زوج خالتي من قبل من سافر بالـ2011، هلأ موجود ببيته نفسه بمدينة اريحا، بعرف أنه كبر كتير، بس مافي تواصل بيناتنا. الأكلة انا بعملها هلأ.. هي أكله الحلو الوحيدة يلي بحبها من قلبي. بترجعني للوقت يلي كنت فيه قبل ما كلشي بحياتي يتغير.

بسبب وجودي بألمانيا وصعوبة الحصول على قشطة تازة، بضطر استبدل القشطة أيام بجبنة موتزاريلا، أو أني حاول اطبخ القشطة بنفسي.

المكونات

  • كنافة 1/3 كيس
  • 4 ملاعق زبدة
  • صبغة عذائية لون أورنج أن وجدت
  • للحشوة
    • قشطة للطبخ
    • جبنة موزاريلا مقطعة لـ 12 قطعة
    • قطر
    • فستق حلبي للتزيين
    • كاسة حليب
    • فنجان حليب مذاب فيه ملعقتين نشاء كبار
    • ملعقة سكر

طريقة التحضير

  1. القشطة: بطنجرة صغيرة منسكب الحليب ومنضيف النشاء المدوب بفنجان حليب وملعقة سكر ومنحرك على نار هادية ليبلش الحليب ياخد قوام سميك وبعدين منضيف قشطة الطبخ لإغناء النكهة.
  2. منفرك الكنافة مع الزبدة والصبغة وبعدين منصف نصف الكنافة بقوالب الكاب كيك ومنكبسها.
  3. منضيف معلقة قشطة مطبوخة بوسط كل قطعة من الكنافة وفوقها قطعة جبنة الموزريلا ومنغطي كل قطعة بالمتبقى من الكنافة.
  4. مندخلها ع الفرن لتبلش الكنافة تاخد لون ومنزينها بالفستق الحلبي ومنضيف القطر.

وصحة وهنا.

نبذة عن الكاتب

إياد كلّاس، شريك مؤسس ومدير البرامج في راديو سوريالي. إياد مدير مشاريع، مدرب ومحاضر، خبير في ميدان ريادة الأعمال، ناشط في مجال المناصرة لحقوق الإنسان والإعلام، بالإضافة لكونه عضو مجلس إدارة في جمعية "رؤية لغد أفضل" يحمل شهادة الماستر من جامعة "بول سيزان"، ومقيم حالياً في بوردوه - فرنسا "عندي حلم إني أسمع سوريالي في أحد مقاهي أي مدينة صغيرة في سوريا، يوماً ما ... قريباً جداً"

Loading Facebook Comments ...