ألف طبخة وطبخة 17 – برغل بحمّص

شوفوا الفيديو كمان عاليوتيوب أو عالفيسبوك أو نزلوه مباشرة

أنا لبنى الفاحلي من طرطوس، عشت بحمص واشتغلت بحلب وهلأ مقيمة في بيروت.

بيذكرني البرغل بحمص بريحة الغار وشوية حطب. ما كنت كتير حبها لأن بمواسم ومناسبات معينة بتصير ألأكلة الوحيدة المتاحة، كنت حبها من طرطوس وما حبا من حمص وع قولة ستي أهل مغرّب بيطبخوها أطيب. الأكلة مرتبطة بسيدة كبيرة (توفت من فترة قريبة) كنت حبها كتير اسمها تاتا أم غالب، هي الأكلة بتذكرني فيها وبصير كأني شايفتا عم تغني للزريعات الصبح وهي عم تسقيهن وتحكيهن وتدللن متل طفل، هالأكلة كتار اللي بيطبخوها بس ما حدا بيطبخها متل تاتا أم غالب، ويمكن ريحة الياسمينة اللي بمدخل البيت بتخرم براسي أكتر من ريحة البرغل. عبق من روائح عجيبة بتتخمر بالراس لمجرد أتذكر هالأكلة ريحة البصل مع ورق الغار والقرفة بمية سلق الدجاج أكتر شي راسخ، والطبخة ع حطب الصنوبر وجمعة العيلة وصوات ضحكات من هون وهون.

عالبعد كل شي بيتغير، ما شفت تاتا أم غالب غير مرتين خلال الخمس سنين الماضية، توفت من فترة قريبة جداً، المكان بعدو موجود، بس البيت مسكر والزريعة دبلانة لأن ست البيت غابت، الشجر زعلان ع غيابها والبرغل بحمص صار ينطبخ بعزا شباب المنطقة حتى البرغل ماعادلو لا ريحة ولا طعم، صفيان كل لقمة بغصة ودمعة ومية حكاية بتوجع. بعدني بطبخ هالأكلة متل ما بتطبخا تاتا أم غالب كتير بصل وكتير غار وعالهدا وبعدني بسمع صوتها بإدني عم تقلي الطبخ يا تاتا بدو طولة بال، مافي شي طيب بالهين، صفنت منيح ع سؤال شو تغير فيي؟ تغير كل شي حتى يمكن بحس جوايي دافع اتعلم كل هاد الطبخ منشان ما أنذل بحنين يوجعني لهداك البلد.

بحب أطبخها تماما متل ما تاتا بتطبخا، اللي بغيرو هو بعد سلق الجاج، الجاج المسلوق ولو معطر بالغار وحب الهال، بس أكلة مسطحة وغبية، مرة كنت عم دور ع تتببيلة سلطة فخطرلي انو ليش ما بتبل الجاج المسلوق بخردل وعسل ومع عرق ميريمة أخضر وهو ما ينقل الدجاج المسلوق من لوحة مسطحة لعمل فني ثلاثي الأبعاد ومنضيف لمسة جديدة وعصرية على أكلة قديمة بقدم هديك المنطقة السورية.

المكونات

  • 250 غ صدور دجاج
  • 4 بصلات صغار
  • نصف علبة حمص حب
  • نص كاسة زيت زيتون
  • كاسة برغل
  • بهارات/ورق غار/قرفة/بهار حلو/هال/فلفل أسود
  • لتر ماء

طريقة التحضير

  • منقلي صدور الدجاج بشوية زيت ومنضيف كل البهارات والملح ومنضيف بعدين البصل وبعدين المي ومنخليه يغلي ومنقش الزفرة اذا طلعت. ومنصفي الدجاج والبصل ومنحتفظ بالمرق.
  • منحط شوية زيت بطنجرة ومنضيف البرغل والحمص المسلوق ومنضيف كاسة من مية سلق الدجاج وملح.
  • مننطر لتنشق المي ع البرغل لنفضي البرغل بصحن التقديم ومنجللو بالدجاج والبصل.

وصحتين وهنا

نبذة عن الكاتب

إياد كلّاس، شريك مؤسس ومدير البرامج في راديو سوريالي. إياد مدير مشاريع، مدرب ومحاضر، خبير في ميدان ريادة الأعمال، ناشط في مجال المناصرة لحقوق الإنسان والإعلام، بالإضافة لكونه عضو مجلس إدارة في جمعية "رؤية لغد أفضل" يحمل شهادة الماستر من جامعة "بول سيزان"، ومقيم حالياً في بوردوه - فرنسا "عندي حلم إني أسمع سوريالي في أحد مقاهي أي مدينة صغيرة في سوريا، يوماً ما ... قريباً جداً"

Loading Facebook Comments ...