ألف طبخة وطبخة 16 – فاصوليا حب

شوفوا الفيديو كمان عاليوتيوب أو عالفيسبوك أو نزلوه مباشرة

أنا آدم من الحراك بدرعا. ومقيم حالياً بالمانيا، جومرسباخ، الفاصوليا حب بتذكرني بأمي وكيف كنت متكبر عالأكل، كمان بتذكرني بالقصر العدلي بدمشق، لساتو المكان متل ما هو. اليوم بعتبرها اطيب أكل بالعالم . بعد ما اعتقلونا ١٣ يوم بالفرع نقلونا عالقصر العدلي يوم خميس ساعة ٣ الظهر، وكنا من قبل بيوم بلا أكل. كان القاضي رايح فبدهن ينيمونا بالقصر العدلي وتاني يوم برحلونا ع سجن عدرا. الساعة سبعة ونص جابولنا كل واحد رغيف خبز وكل ستة اشخاص ع طنجرة فاصوليا حب ورز مخلوطين ببعض وكان مكان تواجدي جنب التواليتات بيسموها البخشة بالسجن وكنير بكيت وأنا عم آكلها. قبل ما اطلع من عدرا بكم يوم حكيت مع أمي تلفون قالتلي شو بتحب اطبخلك بس تطلع قلتلها فاصوليا حب صارت تبكي وتقلي والله ما بقى اطبخها قام كمان بكيت وقلتلها والله كتير صرت حبها وفعلاً هلأ كتير بحبها. طبعا قبل الـ٢٠١١ وقت كانت تطبخها كنت عصب وحط كيلو ملح ع الطبخة مشان يكبوها ويعني هيك.

فليفلة خضرا معها تعتبر ضرورية.

المكونات:

  • 200 غ لحم مفروم
  • علبة فاصوليا حمرا
  • حبة فليفلة حمرا
  • جزرة مبروشة
  • سنين توم مدقوق
  • بصلة حمرا
  • بهارات/كمون/شطة
  • حبة بندورة مقشرة
  • معلقتين رب البندورة
  • رشة سكر
  • رشة خل
  • معلقة زيت زيتون
  • نص كاسة مي

طريقة التحضير

  1. منقلي اللحمة بالزيت بمقلاية ومنضيف البهارت /الملح/الكمون/ الفليفة الحمرا/ فلفل.
  2. منضيف البصل والفاصوليا والجزر والفليفلة الحمرا ورشة السكر والخل.
  3. منضيف ربع كوب المي ومنتركها تغلي لتمتزج المكونات.

وصحتين وهنا

نبذة عن الكاتب

إياد كلّاس، شريك مؤسس ومدير البرامج في راديو سوريالي. إياد مدير مشاريع، مدرب ومحاضر، خبير في ميدان ريادة الأعمال، ناشط في مجال المناصرة لحقوق الإنسان والإعلام، بالإضافة لكونه عضو مجلس إدارة في جمعية "رؤية لغد أفضل" يحمل شهادة الماستر من جامعة "بول سيزان"، ومقيم حالياً في بوردوه - فرنسا "عندي حلم إني أسمع سوريالي في أحد مقاهي أي مدينة صغيرة في سوريا، يوماً ما ... قريباً جداً"

Loading Facebook Comments ...