ألف طبخة وطبخة 15 – الملضوم

شوفوا الفيديو كمان عاليوتيوب أو عالفيسبوك أو نزلوه مباشرة

أنا ناندا محمد من الشام ومقيمة بالقاهرة، مصر. أكتر شي بتذكره بالملضوم هو جمعتنا ببيت ستي بالشام .. انا ولدت وربيت ببيت جدي وستي وكنت كتير انبسط لما ستي كانت تطبخ ملضوم عالغدا، مو بس لأنها طيبة كتير وكلنا كنا نحبها كمان لأنو جدي كان ينبسط كتير لما ستي تعملها لأنها كانت من الاكلات الجزراوية القليلة يلي كانت ستي الشامية تعملها.

جدي من الجزيرة، وستي تعلمت الاكلة هونيك لما عاشت معو فترة بالجزيرة بأول زواجهم. الأكلة بتذكرني بجدي، كان شخص حباب كتير وأنا بحبه كتير. توفى سنة 1991 بس انا لليوم بتذكره كتير وكتير مأثر فيني …. كان شخص كتير بيحب الناس ومهضوم وبيحب عيلته وبيحب يضل متذكر أصله من وين، وكل ذاكرته عن مدينته كانت حاضرة دايماً، حتى لما ترك الجزيرة واجا عاش بالشام لما تجوز ستي.

المكان يلي مرتبط عندي بالملضوم هو ييت ستي وجدي بالشام .. البيت العربي الكبير يلي كان معبى بالعيلة الكبيرة وهلق فاضي ومهجور تقريبا، ماضل حدا من عيلتنا بالشام. من الـ2011 لهلق طلعنا واحد ورا التاني.

ما تغيرت علاقتي بهالأكلة غير أني صرت اطبخها أكتر وكل العيلة بتطبخها لهلق، وانا بحب اطبخها ودايماً بنبسط لما بعملها وبنبسط انو جوزي المصري بيحبها. وما بضيف عليها شي جديد، بطبخها بالزبط متل ما علمتني ياها أمي. بس أمي عملت اضافة على وصفة ستي، ماما بتحط شوفان للحمة، انا احيانا بعمل هيك واحيانا لأ.

المكونات

  • 400 غ لحم غنم مفروم
  • حبتين بيتنجان
  • حبة فليفلة حمراء
  • 4 حبات بندورة
  • حبتين كبار بطاطا
  • نص كاسة زيت نباتي
  • نص كاسة مي
  • بهارات،كمون،ملح

طريقة التحضير

  1. منخلط اللحمة بزبدية غميقة مع البهارات الكمون والملح ومندعكها بإيدنا أو منحركها بشكل جيد، بعدبن منقطعها لقطع ومنكورها.
  2. بصينية الفرن منصفّ البطاطا والبيتنجان ومندهنهم بزيت النباتي وملح ومندخلهم عالفرن بدرجة حرارت 200 لمدة 20 دقيقة.
  3. منقطع البندروة والفليفلة والحمرا ومنصفها بصينية فرن او بيركس مع كرات اللحمة والبطاطا والبيتنجان اللي كانوا بالفرن.
  4. منضيف كاسة مي ومندخلها ع فرن بدرجة حرارة 180 لمدة 30 دقيقة طبعا مناكلها سخنة.

وصحتين وهنا.

نبذة عن الكاتب

إياد كلّاس، شريك مؤسس ومدير البرامج في راديو سوريالي. إياد مدير مشاريع، مدرب ومحاضر، خبير في ميدان ريادة الأعمال، ناشط في مجال المناصرة لحقوق الإنسان والإعلام، بالإضافة لكونه عضو مجلس إدارة في جمعية "رؤية لغد أفضل" يحمل شهادة الماستر من جامعة "بول سيزان"، ومقيم حالياً في بوردوه - فرنسا "عندي حلم إني أسمع سوريالي في أحد مقاهي أي مدينة صغيرة في سوريا، يوماً ما ... قريباً جداً"

Loading Facebook Comments ...