ألف طبخة وطبخة 14 – عجة الكوسا

شوفوا الفيديو كمان عاليوتيوب أو عالفيسبوك أو نزلوه مباشرة
أنا أوس من دمشق مقيم بآخن، ألمانيا. بتذكرني عجة الكوسا بمطبخ بيتنا بأرضيتو الخمرية وبلكونو الصغير. للصراحة بصغري ما كنت من محبي العجة بشكل عام لكن مع الوقت بلشت حبها واليوم بتربطني هالأكلة بأيام حلوة عشتها بصغري و شبابي. عجة الكوسا تحديداً مرتبطة عندي بالصيف بكل طقوسه. العطلة الصيفية. إلعب بالحارة وإطلع عالبيت الضهريات بعد جولة اللعب الصباحية و افتح باب البيت وتغمرني رائحتها و هية عم تنقلى. وشباك المطبخ اللي صار فينا نفتحو بشكل كامل بدون ما ناكل هم البرد.

هالأكلة مرتبطة عندي ببيتنا وبعائلتي الصغيرة وبس…يعني ذكريات خاصة. مع أنو تحضيرها سهل لكن ما بذكر بعد ما تغربت أني أكلت عجة الكوسا بشكلها اللي وعيت عليه إلا مرات قليلة. يمكن لأنو مرتبطة عندي بالبيت، يمكن لأنو بحاول دائما اندمج بمطبخ البلد اللي أنا فيه بأسرع وقت ممكن. بضيف عليها الشبت أو متل ما بيتسمى بالإنكليزية “dill”.

المكونات

  • ملعقيتن طحين
  • 3 بيضات
  • بصلة مبروشة
  • كوسايتن مبروشين
  • جزرتين مبروشين
  • بطاطا مبروشة
  • بقدونس
  • بهارت وملح
  • بيكنع بودر

طريقة التحضير

  1. منخفق البيض بزبدية غميقة شوي ومنضيف البيكنغ بودر/صودا والطحين ومنخلط المزيج.
  2. منضيف ع المزيح الكوسا والجزر والبصل والبطاطا وملح وبهار ومنحرك المزيج بشكل جيد.
  3. بملعقة منشكل قراص العجة ومنحطهون عالزيت الحامي بالمقلاية  أو منحطهون بقالب الكاب كيك إذا كان متوفر بعد ما ندهن الصينية او القالب بشوية زيت ومندخلها الفرن على درجة حرارة 180 درجة لمدة 20 دقيقة.

وصحة وهنا

نبذة عن الكاتب

إياد كلّاس، شريك مؤسس ومدير البرامج في راديو سوريالي. إياد مدير مشاريع، مدرب ومحاضر، خبير في ميدان ريادة الأعمال، ناشط في مجال المناصرة لحقوق الإنسان والإعلام، بالإضافة لكونه عضو مجلس إدارة في جمعية "رؤية لغد أفضل" يحمل شهادة الماستر من جامعة "بول سيزان"، ومقيم حالياً في بوردوه - فرنسا "عندي حلم إني أسمع سوريالي في أحد مقاهي أي مدينة صغيرة في سوريا، يوماً ما ... قريباً جداً"

Loading Facebook Comments ...