ألف طبخة وطبخة 12 – بالوظة

شوفوا الفيديو كمان عاليوتيوب أو عالفيسبوك أو نزلوه مباشرة

اسمي مهيب من دمشق مقيم بواشنطن العاصمة، اميركا. لما بتذكر البالوظة بتذكر جدي وهو بدو ياكل منها ونحنا ما عم نخليه منشان السكري.. ما قبل السبليندا، بتذكر جمعات العيلة كمان.

جدي ممدوح ..مات من ١٧ سنة بتذكره وهو قاعد بأوضة القعدة عم يسمع البي بي سي عربي وعم يشم ريحة البالوظة بما أنو ما كان بيقدر يشوف.. البيت بعناه من زمان بعد ما ضلينا فيه من الـ٦٢، هاد الزلمة يلي عاش الحنطور للتلفون اللاسلكي وصار يدقدق لكل العيلة و يقلون عم حاكيك و اتفتل. بلش تاجر تحت ايد أبوه بس كان بيحب العلم فدرس. كان بدو طب بالأول بس أول زيارة لكلية الطب فات بالغلط للمشرحة وشاف جثة عم تتطالع. وحلف أنو أول شعرة بيضاء بلشت من وقتا. فقرر عالحقوق وتعين قاضي تحقيق بحمص وصار يشوف الجثث قبل الطبيب الشرعي ووقتا كمل الشعر الابيض وهر. أمه كانت من أوائل مديرات المدارس بالتلاتينات وحببتو بالعلم. بيحب سيران الربيع بالغوطة وينق لناخدوا عليه ولو أنو ما بيشوف ويقللنا حكيلي عالزهر وأنا صير ألف من عندي لأنو ما عاد في زهر وقتا. عندي قصص كتير عنو، خصوصي لما راحت واسطتوا بالخمسينات و قدفوه قاضي بالدرباسية، مالقاها عالخريطة بالاول. طلعت تحت خط القطار مع تركيا.

بعمل البالوظة قليل وما بتخطر عبالي إلا إذا كان في جمعة. بقلل مستكة أحياناً أو بزيد نشا حسب المود ووضع الريجيم.. وأحياناً بعصر بردقان على إيدي و احياناً لا.

المكونات

  • حليب
  • عصير برتقال
  • ملعقتين نشاء
  • سكر

طريقة التحضير

  1. كاستين عصير
  2. إضافة ملعقتين نشا
  3. إضافة 3 ملاعقسكر
  4. إضافة برش برتقال
  5. تحريك بالمضرب على نار هادئة حتى تتماسك
  6. سكب البرتقال في قوالب الكب كيك Cup cake
  7. تبريده جيداُ تمهيداً لسكب الحليب فوقه.
  8. كاستين حليب
  9. إضافة ملعقتين نشا
  10. إضافة خمس ملاعق سكر
  11. إضافة برش ليمون
  12. تحريك بالمضرب
  13. سكب الحليب في قوالب الكب كيك Cup cake فوق البرتقال المبرد

وصحة وهنا

نبذة عن الكاتب

إياد كلّاس، شريك مؤسس ومدير البرامج في راديو سوريالي. إياد مدير مشاريع، مدرب ومحاضر، خبير في ميدان ريادة الأعمال، ناشط في مجال المناصرة لحقوق الإنسان والإعلام، بالإضافة لكونه عضو مجلس إدارة في جمعية "رؤية لغد أفضل" يحمل شهادة الماستر من جامعة "بول سيزان"، ومقيم حالياً في بوردوه - فرنسا "عندي حلم إني أسمع سوريالي في أحد مقاهي أي مدينة صغيرة في سوريا، يوماً ما ... قريباً جداً"

Loading Facebook Comments ...