ألف طبخة وطبخة 11 – فتة الحمّص

شوفوا الفيديو كمان عاليوتيوب أو عالفيسبوك أو نزلوه مباشرة

أنا سارة من إدلب، مقيمة بمرسيليا، فرنسا، وهي ذكرياتي مع فتة الحمص اللي ريحتا بتذكرني بلمة العيلة يوم الجمعة، الأكلة مقدسة عنا بالعيلة من زمان، بيخطرلي مطبخنا وكلياتنا مجتمعين فيه عم نحضرها وعم نمزح ونضحك. بتذكر بهي الأكلة أكتر شي بابا اللي كان يحضرها، اليوم هو مخطوف عند داعش، وببيتنا بالرقة. وبعد 2013 ما عاد للأكلة نفس الطعم ولا لمسات بابا ووصفته اللي مافي متلها. بتخيل صورة بابا واقف بالمطبخ وعم يعملها، ريحة التوم والطحينة، السمنة يلي عم تتسخن. بكل جمعة الصبح هي الأكلة لازم تكون حاضرة، بتذكرني بكيف كنا نجتمع كلنا بالمطبخ نشتغل تحت إيدين بابا ونحضر يلي بيطلبه منا. بأختي ريم يلي مابتاكل هي الأكلة بس بابا بيحاول كل جمعة معها أنو تدوقها ولما بييأس بيقوللها لجهنم حبيبي. أبي، يلي مابيعمل الشي الا إذا طالع من قلبه، أبي هلق مختطف من الـ2013. من وقتا آكلين الفتة كم مرة بس لأن بابا هو يلي كان يعملها وما عاد إلها نفس الطعمة من وقت اختطافو، ومن وقتا لسا مااجتمعنا.

كنا نفيق كلياتنا الصبح ونتوجه عالمطبخ نجتمع ونمزح ونضحك ونضل فوق راس بابا منشان يخلصا بسرعة منشان ناكل، كنت دوق كل دقيقتين الأكل يلي عم نحضره بحجة أنو عم اتأكد اذا الطعمة طيبة. بيتنا بالرقة هو المكان الأساسي بهالجمعة وهو حاليا مستولى عليه من قبل داعش وهلأ صار حلم كتير بعيد.
هالأكلة بتربطني بجمعة عليتنا نحنا السبع أشخاص بدون ماينقص حدا مننا. اتغيرت من بعد الـ2013 من بعد مانخطف بابا، باكلها بس كتير نادر، مافي حدا بيعملها طيبة متل بابا وأساساً حتى لو أكلتها مالا نفس الطعم بغيابو.

يلي تغير كتير، خمس سنين كبرنا فيهم كتير، صرنا أوعى وأكتر مسؤولية، صرنا نعرف أنو نحن بشر ومن حقنا نعيش متلنا متل كل إنسان طبيعي بحقوق طبيعية.

المكان هلأ تغير كتير، صار بيبعد 3900 كم عن بيتنا، مكان غريب كلياً عليي، ما بنتميلو ولا بينتميلي.

هي الخطوات يلي بيعملها بابا بالتفصيل، بيعملا بطريقة بتاخد العقل وبتشهي فما في داعي نضيف عليها شي.

المكونات

  • علبة حمص حب
  • رغيفين خبز عربي
  • معلقتين كبار طحينة
  • 200 غ لبن
  • نص ليمونة
  • سنين ثوم
  • كمون + بابريكا + ملح
  • ملعقتين سمنة
  • كمشة قلوبات (لوز+صنوبر)
  • كمشة بقدونس مفروم للتزيين

طريقة التحضير

  1. قصقصة الخبز
  2. رشه وتتبيله بالزيت وعلى صينية بفرنعلى حرارة 180 لمدة 15دقيقة
  3. صف الخبز بطبق التقديم
  4. سلق الحمص على النار مع التحريك
  5. تحضير البدوة: منحط بزبدية معلقتبن كبار طحينة ومنضفلهون عصير نص ليمونة ورشة ملح ومنخفهون سوا وبعدين منضيف ع المزيج 200 غ لبن ومنرجع نخفق. واذا طلع المزيح سميك شوي منضيف ربع كاسة مي ومنحرك المزيج.
  6. منحمي معلقتين سمنة او زبدة ومنضيف اللوز والصنوبر
  7. تسقاية الخبز بمرقة الحمص والثوم المدقوق
  8. سكب البدوة
  9. رشة كمون وبابريكا
  10. طش السمنة مع القلوبات
  11. تزيين ببقدونس

وصحة وهنا

نبذة عن الكاتب

إياد كلّاس، شريك مؤسس ومدير البرامج في راديو سوريالي. إياد مدير مشاريع، مدرب ومحاضر، خبير في ميدان ريادة الأعمال، ناشط في مجال المناصرة لحقوق الإنسان والإعلام، بالإضافة لكونه عضو مجلس إدارة في جمعية "رؤية لغد أفضل" يحمل شهادة الماستر من جامعة "بول سيزان"، ومقيم حالياً في بوردوه - فرنسا "عندي حلم إني أسمع سوريالي في أحد مقاهي أي مدينة صغيرة في سوريا، يوماً ما ... قريباً جداً"

Loading Facebook Comments ...