ألف طبخة وطبخة 10 – شاورما

شوفوا الفيديو كمان عاليوتيوب أو عالفيسبوك أو نزلوه مباشرة

أنا نضال من دمشق مقيم بألمانيا بدوسبرغ، وهي ذكرياتي مع شاورما الجاج اللي بتذكرني بالليل لما يكون برد ووقف جنب السيخ لأتدفى. الأطفال بيصمدوا مصروفهن ليجيبوا “أكلات طيبة” شوكولا وبسكويت وبوظة وخلافه. أنا بنفس المرحلة كنت انزل جيب سندويشة شاورما دجاج صغيرة (كانت ب 10 ليرات أو 15 ليرة) وآكلها.. كتير أحياناً نكون قبل بيوم أو يومين آكلين شاورما بالبيت لكن التعامل مع الشاورما كـ”أكلات طيبة” إلها طعم تاني مختلف. الشخص اللي بذكرني فيه هو معلم السيخ، شخص اعتباري… للأسف ما عاد شفته لأنه مافي منه غير بسوريا.. اكتر مكان بتذكره هو المهاجرين.. مكان طفولتي.. كنت انزل من البيت أو من مدرستي بالمهاجرين للسكة.. بكل موقف كان في محل شاورما مختلف عن التاني.. وبعد ما كبرت عرفت محلات كتيرة تانية.. الريان والصحي والجزماتية والشيخ سعد وشارع بغداد ومشروع دمر والقصاع.. لكل محل طعم ونكهة مختلفة عن غيره.. حالياً أنا تعلمت اطبخها.. اول مرة عملتها لحالي ولقيتها طيبة كتير.. ولما دوقتها لأصدقائي حبوها كتير وقالوا انها نفس الشاورما الحقيقية..

الأكلة فيها مكونات كتير.. بصل وتوم وهيل وغار وزنجبيل وبهارات وخل وليمون وفلفل وغيره.. مشان هيك مافي الها وصفة محددة وكل حدا بيطبخ شاورما بيعملها بمقاديره وخلطته..

المكونات

  • 3 ملاعق لبن
  • حب هال
  • فلفل
  • قرفة مطحونة
  • ملعقتين خل
  • رشة زنجبيل
  • عصير ليمونة
  • بشر ليمونة
  • سن توم مهروس
  • معلقتين زيت نباتي
  • صدر دجاج
  • معلقة دبس فليفلة وهي اختيارية

طريقة التحضير

  1. منشرّح صدر الدجاج ومنحطوا بكيس ومندقوا بمطرقة اللحم لنرققوا وممكن نستخدم بدل مطرقة اللحم مدقة التوم او الشوبك حسب المتوفر عندكون.
  2. منخلط جميع المكونات والمطيبات بزبدية غميقة ومنغمر الدجاج بالتتبيلة ومنغطيها بكيس ومنحطها بالبراد طوال الليل مشان تكسب وتتشرب كل طعمة التتبيلة.
  3. منحط شوية سمنة او زبدة او زيت نباتي بمقلاية ومنقلي فيهون الدجاج مع الانتباه انو لازم تكون التقلاية على نار قوية كل وش لمدة 4 دقايق لحتى يتحتفظ الدجاج بالمي تبعو.

وصحتين وهنا

نبذة عن الكاتب

إياد كلّاس، شريك مؤسس ومدير البرامج في راديو سوريالي. إياد مدير مشاريع، مدرب ومحاضر، خبير في ميدان ريادة الأعمال، ناشط في مجال المناصرة لحقوق الإنسان والإعلام، بالإضافة لكونه عضو مجلس إدارة في جمعية "رؤية لغد أفضل" يحمل شهادة الماستر من جامعة "بول سيزان"، ومقيم حالياً في بوردوه - فرنسا "عندي حلم إني أسمع سوريالي في أحد مقاهي أي مدينة صغيرة في سوريا، يوماً ما ... قريباً جداً"

Loading Facebook Comments ...