ألف طبخة وطبخة 4 – كبّة العدس

شوفو الفيديو كمان عاليوتيوب أو عالفيسبوك أو نزلوه مباشرة

اسمي سارية مرزوق، من دير الزور ومقيمة في برلين، ألمانيا. بتذكرني كبة العدس بالبراري. هالأكلة مرتبطة غالباً بإيام العطلة (الجمعة تحديداً) عالغدا مع العيلة أيام الربيع وخصوصي لما بيبلش يطلع البصل الأخضر لأن كنا ناكل الخضرة بمواسمها. المهم هالأكلة تعتبر مقبلات باردة، تقدم مع المشاوي والسلطة الخضرا الناعمة. ماما تنفرد بطابع خاص بتحضيرها، بيبلش من تنقاية العدس ونقع البرغل وتقطيع الخضرة ورشة زيت الزيتون الكريمة بس بعيار مدروس (مشان ماتمرمر). الله يذكرك بالخير يا ماما.

غالباً اللي عندو جنينة بالبيت بيعمل المشاوي كل جمعة وترافقها بالطبع أكلة كبة العدس. بإيام الربيع وبداية الصيف تبدأ طقوس الطلعة عالبراري (الشول أو البرية بالتسمية المحلية. الهواء عليل وجاف والزهر بلش يطلع والطقس الاجتماعي المحبب عند أهالي الدير هو “الهجّة عالشول ” يعني الهرب من المدينة للبراري. يطلعوا بسيارات والعدة من ورا أو قاعدة بحضننا والسلامات شغالة من شبابيك السيارات 🙂 أكثر كان واحد كان يحب كبة العدس هو بابا الله يرحمه وبعدو عمي أبو عمرو (الله يذكره بالخير). بسبب الأحداث تنقل هو وعيلته لمناطق مختلفة وسمعت أنه اشتغل مع لجان الهلال الأحمر فترة (هو طبيب أطفال) وبعد طلعتي ع ألمانيا سمعت إنهم استقرو بدمشق. علاقتنا لا زالت طيبة ولو على تعبير الكبارية كل واحد صار مشغول بحاله وبس. إيه. الله ييسر للجميع ويحمي الكل.

“الشول” هو المساحة الممتدة بين مدخل الدير الشرقي وأول البادية السورية باتجاه تدمر-دمشق. مناطق منبسطة وأحيانا بتلاقي تلال صغيرة وهي أماكن ممتازة لبناء خيمة بعيداً عن تيار الهوا. بتبلش المشاوي وهي اختصاص شباب العيلة والنساء مسؤولات عن عيار الوقت لتكون كبة العدس وباقي المقبلات جاهزة بنفس الوقت مع أول وجبة مشاوي تنزل عن النار، وغالباً تكون من حصة النساء (نسميها برة، بضم الباء). أنا ما تدمشقت رغم سكني شبه الدائم بدمشق بعد تخرجي و طلعتي ع ألمانيا. لأني يمكن عشت فترة اساسية بحياتي تمتد لحوالي 18 سنة بدير الزور ولأني ديرية الأب والأم وطبعي ومزاجي لازال يشبه الفرات. والأكلات اللي تعلمتها من مطبخ ماما والتيتة (اللي منسميها حبابة) هي أكلات أساسية بمطبخي حتى تاريخ الإجابة على هذه الأسئلة 🙂 لكن بطبخ كمان أكلات دمشقية وحلبية و من كل مناطق سوريا ع قد معرفتي وحبي للأكلة اللي بيدفعني لأتعلمها من مصدرها. لما كان في صعوبة إني أحصل عالمواد الأولية أثناء وجودي بألمانيا 2007 كنت وصي اللي جايين من الشام على لوازمي وماحدا كان بيقصر 😉 سقى الله.

بحاول احتفظ ببساطة المحتوى لأن غالباً السر يكون بتوازنها البسيط. السحر يمكن بالتقديم وإضافة بعض اللمسات لطبق التقديم، ديكور ع قولة ماما.
المكونات

  • نص كاسة عدس أحمر
  • جرزة بصل أخضر مفروم
  • جرزة بقدونس مفروم
  • نص كاسة برغل ناعم
  • رشة ،شطة،كزبرة،كمون
  • رشة ملح
  • زيت زيتون

طريقة التحضير

  1. منحط البرغل الناعم المغسول بزبدية غميقة شوي ومنضيف العدس الأحمر المسلوق ومنضيف البهارات والملح ورشة زيت الزيتون ومنخلط بشكل جيد ومنكبكب الخليط.
  2. بصحن تاني منخلط البقدونس مع البصل الأخضر مع بعض.
  3. منغمس قراص الكبة بالبقدونس والبصل المفرومين ومنصفهون بصحن التقديم.

ملاحظة: هي الاكلة بتتسمى بالأرمني “Vospov Kofta”

وصحتين وهنا

نبذة عن الكاتب

إياد كلّاس، شريك مؤسس ومدير البرامج في راديو سوريالي. إياد مدير مشاريع، مدرب ومحاضر، خبير في ميدان ريادة الأعمال، ناشط في مجال المناصرة لحقوق الإنسان والإعلام، بالإضافة لكونه عضو مجلس إدارة في جمعية "رؤية لغد أفضل" يحمل شهادة الماستر من جامعة "بول سيزان"، ومقيم حالياً في بوردوه - فرنسا "عندي حلم إني أسمع سوريالي في أحد مقاهي أي مدينة صغيرة في سوريا، يوماً ما ... قريباً جداً"

Loading Facebook Comments ...