ألف طبخة وطبخة 3 – مسخّن فلسطيني

شوفو الفيديو كمان عاليوتيوب أو عالفيسبوك أو نزلوه مباشرة

أنا سماك من حلب. عشت بالأردن ومقيم بقطر. ذكرياتي مع المسخن الفلسطيني مرتبطة بالشتي، ريحتا بتذكرني بالتلج والمطر والهوا البارد، لأنها أكلة شتا بتعطي دفا للجسم. ببيخطر عبالي لمة العيلة جنب الصوبيا والأكل بالإيد والزيت عم يشرشر من الكواع وحرقة المعدة بالليل من بعده، وكانت الأكلة اللي ننبسط لما ننعزم عند رفقاتنا عليها لأن الكل بيحبا. مرتبطة كمان بالحنين لحضن الوالدة اللي بعدتنا عنه الظروف وهي ما كانت تحب هالأكلة بس تعملها كرمالنا وهي هي تضحية الأم.
وبتذكرني بالأردن اللي عشت فيه وتعلمت فيه هالأكلة ودقتها أول مرة هنيك. لساتني بطبخا وباكلا بشغف، لأني بحبها، لا بل بعشقها. بعملها بطريقة صحية. بالفرن بدون أي تقلاية. وأهم سر فيها هوه السماق البلدي يلي مو متوفر بأي مكان، بوصي عليه توصاية من الأردن. ما بعمل إضافات عليها لأنو بحبا متل ما كنت آكلا زمان، حامضة وبتلدع وبتعمل حرقة.

المكونات

  • نصف دجاجة
  • 3 بصلات كبار
  • ملعقتين كبار سماق
  • رشة ملح
  • كاسة زيت زيتون
  • رشة بهارات
  • 4 أرغفة خبز مرقوق

طريقة التحضير

  • منسلق الدجاج وطبعا منضفلوا المطيبات المعتادة وقت السلق ومنحتفظ بشوية مرق جاج لانو راح نستخدمها.
  • منفصل الدجاج عن العضم ومنفتته قطع صغيرة.
  • منقلي البصل المقطع جوانح بزيت زيتون بدون ما يتحمص ومنضيف السماق وملح والدجاج ونتفة من مرقة الدجاج ومنحرك.
  • منجيب الخبز المرقوق ومنلف فيه الدجاج المسخن فيه
  • منصف اللفات بصنية الفرن ومندهنهون بزيت الزيتون ومندخلهون على فرن درجة حرارته 180 لمدة نص ساعة.

وصحتين وهنا.

نبذة عن الكاتب

إياد كلّاس، شريك مؤسس ومدير البرامج في راديو سوريالي. إياد مدير مشاريع، مدرب ومحاضر، خبير في ميدان ريادة الأعمال، ناشط في مجال المناصرة لحقوق الإنسان والإعلام، بالإضافة لكونه عضو مجلس إدارة في جمعية "رؤية لغد أفضل" يحمل شهادة الماستر من جامعة "بول سيزان"، ومقيم حالياً في بوردوه - فرنسا "عندي حلم إني أسمع سوريالي في أحد مقاهي أي مدينة صغيرة في سوريا، يوماً ما ... قريباً جداً"

Loading Facebook Comments ...