ألف طبخة وطبخة 1 – فتة المكدوس

شوفو الفيديو كمان عاليوتيوب أو عالفيسبوك أو نزلوه مباشرة 

“أنا يسار دهني من دمشق، مقيمة بهامبورغ، المانيا. فتة المكدوس بتذكرني بالعزايم، و أكتر شي برفيقتي رندة الإعلامية الجميلة يلي ما أخدت حقها بإعلام سوريا. كانت رفيقة صبايي وجارتي ومشاويرنا وضحكاتنا مع بعض وحارتنا و مونة الصيف. كانت رندا تعشق الطبخ، وللأسف اليوم أخبارها مقطوعة من وقت تركت البلد. مرتبطة الطبخة كمان بالشام، بالمزة، ببيت أهلي والحمدالله المكان لسه موجود.

ومرتبطة بقصة طريفة صارت من تلاتين سنة، لما كنت مخطوبة كانو بيت حمايي يللي ساكنين بمدينة تانية يحبو يفاجؤونا بزيارات مباغتة، وبيوم وبعد ما خلصنا غدا وتسطحنا اندق الباب، فتحنا لقينا ست أشخاص حجم كبير من بيت حمايي، وطبعاً لازم نقوم بواجب الغدا المفاجيء، جارتي رندة عرفت فوراً. وقالتلي إنتو قعدوا مع الضيوف وعليي الباقي. خلال ساعة وصل غدا ساحر، و صينية فتة مكدوس كانت الطبق الأساسي ومن وقتا بحلم بجارة تكون جنبي عند الحاجة تحبني هالقد وجاهزة بأي وقت للتعبير عن هالمحبة.

كل شي تغير بعد الـ ٢٠١١ الناس يللي منحبهون صارو بعاد والمزاج تغير والمكان اختلف كلياً. وافتقدنا لوجود مكونات كتير من طبخاتنا، قليل كتير لأطبخ فتة المكدوس لأنه ببساطة صار في أكلات ذكرياتها بتوجعني كتير وبتزيد حنيني. وحتى عيلتي صارت جمعتها عالأكل قليلة وفي أكلات ما بتتاكل الا بجمعة العيلة.

وقتي صار قليل وبالي مو دايماً رايق، والطبخ بدون رواق. وفوق كل هالشي، طبيعة هامبورغ الباردة قليلة الشمس بتخلي بعض الأكلات غير مقبولة.

بسبب وجودي بالغربة وغياب كتير من مكونات أكلاتنا الأساسية بضطر ابتكر إضافات أو تعديلات بالطبخة. مثلاً فتة المكدوس بعملها ببيتنجان مقطع ومقلي واللحمة فوقه. والقشطة و الجبنة تصنيع محلي وحتى المكدوس نجحت بتحضيره من بيتنجان كبير.

حتى البهارات بتختلف طعمتها بهالبلد، وأهم شي اتذكر ريحة الطبخة كيف كانت وطعمتها وأعطي هالريحة وهالطعمة حتى لو بمكونات مختلفة.
النتائج عم تكون رائعة و احياناً عم تتفوق على الاصل.”

المكونات وطريقة التحضير،للمبتدئين والعزابية:

  • 200 غ لحم غنم مفروم
  • 4 حبات كبار باتنجان
  • رغيفين خبز عربي
  • كأس زيت زيتون
  • معلقتين كبار طحينة
  • بصلتين متوسطات بصل
  • 250 غ لبن
  • نصف ليمونة ليمون
  • سنين ثوم
  • ملعقتين كبار رب بندورة
  • بهارات + ملح
  • ملعقتين سمنة
  • كمشة قلوبات (لوز+صنوبر)
  • كمشة للتزيين بقدونس مفروم

طريقة التحضير

  1. منقطع الخبز لقطع صغيرة ومنحط الخبر بصينية الفرن ومنضيف شوية زيت ومنحرك الخبز ليتبّلوا بالزيت.
  2. مندخل الخبز على فرن درجة حرارتوا 180 درجة لمدة 15 دقيقة.
  3. منصف الخبز بعد ما طلعناه من بالفرن بطبق التقديم.
  4. منقلي 200 غ لحم عجل بشوية زيت يتون ومنضيف رشة ملح وفلفل وبابريكا وبهارات وطبعا ملح.
  5. منضيف فوق اللحمة بصلة مفرومة وسنين توم مدقوقين وربع لتر ماء ومعلقتين رب البندورة، ومنحركوهون ليبلشوا يغلو ويتعقدوا.
  6. منحط 4 حبات بيتنجان كبار بصينية ومندهنهون بالزيت والملح ومنحطهون بالفرن لمدة 20 دقيقة على درجة حرارة 200.
  7. منحط بزبدية معلقتبن كبار طحينة ومنضفلهون عصير نص ليمونة ورشة ملح ومنخفهون سوا وبعدين منضيف ع المزيج 250 غ لبن ومنرجع نخفق. واذا طلع المزيح سميك شوي منضيف ربع كاسة مي ومنحرك المزيج.
  8. منحمي معلقتين سمنة او زبدة ومنضيف اللوز والصنوبر.
  9. ومنصف البيتنجان فوق الخبزات. ومنضيف صلصة اللحم فوق البيتنجانات اللي بصحن التقديم بحيث يتوزعوا على محتويات الصحن ويتسقوا. منسكب البدوة بحيث تتوزع بشكل متساوي فوق البيتنجان وصلصة اللحم.
  10. بهالأثناء بتكون السمنة صارت حامية وجاهزة لنطشها فوق فتة المكدوس
  11. للتزيين منحط شوية بقدونس مقطع.

وصحة وهنا

نبذة عن الكاتب

إياد كلّاس، شريك مؤسس ومدير البرامج في راديو سوريالي. إياد مدير مشاريع، مدرب ومحاضر، خبير في ميدان ريادة الأعمال، ناشط في مجال المناصرة لحقوق الإنسان والإعلام، بالإضافة لكونه عضو مجلس إدارة في جمعية "رؤية لغد أفضل" يحمل شهادة الماستر من جامعة "بول سيزان"، ومقيم حالياً في بوردوه - فرنسا "عندي حلم إني أسمع سوريالي في أحد مقاهي أي مدينة صغيرة في سوريا، يوماً ما ... قريباً جداً"

Loading Facebook Comments ...